DOH nagpapasaway na, iniipit pa an LGUs

Pang-iipit an ginigibo kan Departamento de Salud (DOH) sa mga lokal na gobierno na sagcod sa ngunian iginigilid sana an multi-party agreement (MPA), dai pinipirmahan nganing makabakal nin sadiring vaccines direkta sa supplier para dai na magparaasa sa patingi-tinging suplay sa LGUs nganing labo-labo an saindang pagbakuna contra sa coronavirus disease.

Nagugulpi na an DOH alagad nagpapasaway ta’no ta dai pinipirmahan an pinadarang MPA kan Ciudad nin Naga apesar bulan pa nin Hunyo 24 pinadara ni Alcalde Nelson Legacion an surat ki Secretary Francisco Duque.


‘‘I will ask the DOH during the plenary session, mawot kun maaraman kun ano an rason mantang nagpapadagos an budget hearing.’’


Ini an mga pahayag ni Congressman Gabriel H. Bordado Jr. kan tercer distrito kan Camarines Sur mantang bako lang Ciudad nin Naga an apektado envez 62 nang LGUs sa nasyon an naghahalat sa aksyon kan DOH sa saindang hinahalat na mapirmahan na MPA.


Si Duque, nag-aatubang nin controvercia sa publiko sa mga pigcucuestion na transaksyon kan DOH, alagad pigsusurog pa ni Presidente Duterte.


Nagpahayag na siya na andam nang mag-demiter sa puesto alagad nuarin, hapot kan representante kan tercer distrito kan Camarines Sur.


Sinabi ni Alcalde Legacion labi pa sana sa 18 mil an na-babakunahan asin ini nagrerepresentar kan 18 por ciento pa sana kan 209 mil na populasyon kan ciudad.


Sa state of the City Report kan jefe ejecutivo kan Septiembre 7, liwat niyang natuyawan an DOH sa kawaran nin aksyon ni DOH Secretary Duque ta sagcod sa ngunian dai nagpipirma sa MPA.


An City Hall haloy nang naka-andam an alokasyon na P63 milyon nganing ibakal nin vaccines direkta na sa supplier alagad kaipuhan pang magpirma muna an DOH sa MPA.


Dinagdag pa ni Bordado na kan Lunes, Septiembre 6 direkta na siyang nag-apod ki Director Ernie Vera kan DOH Bicol sa Ciudad nin Legazpi alagad an pigtutukdo iyo an saindang opisina central.


Alagad hinagad niya na padarahan na nin dugang na suplay kan vaccines an City Hall nganing ipadagos an vaccination sa JMR Coliseum. Nagcierto na an direktor sa congresista na diez mil doses nin vaccines an ipapadara sa Naga asin dapat magcoordinate muna sa City Hall nganing maaraman.


Enot nang nagrereclamo an City Hall huli ta dai patas sa distribusyon nin vaccines sa LGUs. (DPA)