top of page

Double shifting sa klase solusyon sa kakulangan manga classroom

An Camarines Sur National High School (CSNHS) sa Ciudad nin Naga na may pinakadakulang populasyon nin estudiantes sa Camarines Sur saro man sa mga escuelahan na nagkukulang an classroom alagad an solusyon iyo an double shifting kan klase.

Sinabi sa Bicol Mail ni Principal Sulpicio Alferez III, ngunian na school year 2022-2023 igwang 11,472 an saindang populasyon kumpara kan nakaaging school year na 11,700.


Sa ribo-ribo nindang estudiantes dawa igwa pang pandemya nagdesisyon sinda na ipasunod an double shifting sa klase mantang dai magamit si lomang 43 na mga classroom huli ta raraot na.


An 75 por ciento kan estudiantes yaon sa saindang bagong mga school buildings sa Villanueva Ave., Ciudad nin Naga na mahiwas an lugar dakul pa an mga classroom.


Sinda amay nang nagpasunod kan full face-to-face classes kan Agosto 22, 2022 alagad saindang estrictong pig-iimplementar an health protocols kan Department of Health maging kan lokal na gobierno.


Ini dawa na ngani an ‘‘100 percent in person classes’’ dapat magpuon sa Noviembre 2, 2022 base sa direktiva ni Bise Presidente asin DepEd Secrertary Sarah Duterte.


An CSNHS sa Ciudad nin Naga iyo an ika-duwa sa Tabaco National High School sa Albay na may halangkaw na populasyon. (dpa)

Commentaires


bottom of page