DPWH Sec. Dizon mabisita sa Bicol, Visayas sagcod sa Mindanao

Nakatalaan na magbisita sa Rehiyon Bicol sa paagi nin road trip si Secretaryo Vince Dizon kan Department of Public Works and Highways (DPWH) sa maabot na Viernes, Enero 16 nganing mag-inspeksyon sa kamugtakan kan raraot nang Andaya Highway orog na sa premir distrito kan Camarines Sur.

Alagad piglinaw sa miembros kan media ni Dizon na kabale sa dapat ma-inspeksyon sa mga highway hale sa provincia kan Quezon, Maharlika Highway sa Camarines Sur asin iba pang provincia kan Bicol sagcod sinda sa rehiyon kan Visayas asin Mindanao kaibanan an ibang miembros kan prensa.

Katuyohan kan saiyang pagbisita nganing maheling niyang personal an kamugtakan kan Quirino Highway, Maharlika Highway orog na an Andaya Highway na haloy nang pigtutuyaw perang taon na an nakakaagi sagcod nagiging isyu sa politica cada eleksyon.

Bako lang pag-bisita o inspeksyon sa mga highway envez ma-implementar an massive rehabilitation, sabi pa ni Dizon.

Antes kan saiyang pagbisita sa Bicol, pinatukaw na an bagong regional director kan DPWH na si Kadhaffy Tanggol karibay ni Director Virgilio Eduarte na floating ngunian an saiyang kamugtakan. Magiging ka-tandem ni Tanggol bilang ARD iyo si Ferdinand Dallo. An bagong DPWH RD sa Bicol dating nadestino sa CAR region.

Kamugtakan kan ibang porsyon kan Andaya Highway sa premir distrito kan Camarines Sur orog na kun panahon nin Deciembre dawa na ngani regular an rehabilitasyon kan DPWH.