DPWH V nagpapatindog nin mga modular hospital

Igwa nang simbag an gobierno sa pagkulang-kulang Covid-19 wards sa Bicol Medical Center (BMC) asin iba pang hospital sa Bicol sa paagi kan pinadarang cuarenta y dos (42) na mga modular container van kan opisina rehiyonal kan Department of Public Works and Highways (DPWH).


Sa cada provincia kan Albay, Camarines Sur asin Camarines Norte pinadarahan nin tig-katorceng container vans.


Napag-araman kan Bicol Mail sa Office of the Presidential Adviser for Bicol Affairs (OPABA) na pigdara sa Cadlan, Pili, Camarines Sur an mga Covid-19 facilities mantang yaon digdi an extension hospital kan BMC na iyo an Cadlan Mental Hospital.


Pigpupunan na ngunian na semana an instelasyon kan mga facilidad na igwang tolong bed capacity cada saro boot sabihon kun katorce igwang total na 42 na Covid wards.


Sinabi pa 40 footer an langkaw kan container van na converted sa tolong cuarto asin aircondition sa dai mahahaloy magagamit na bilang dugang na Covid isolation center sa Camarines Sur.


Si Dr. Francisco Sales, Medical Director kan BMC nagsabi na makakatabang an dugang na mga facilidad mantang padagos na nasa full capacity na an saindang Covid wards.


Sa Albay na kabale sa pinadarahan container van, kinumfirmar kan Department of Health na nasa full capacity na an Covid wards sa Bicol Regional Training and Teaching Hospital.


Nag-apelar an DOH sa mga lokal na gobierno sa Bicol na dugangan an saindang mga isolation center nganing digdi na darahon si mga mild asin asymptomatic patient sa virus sa tahaw kan naglalala an caso kan Covid-19 sa rehiyon Bicol.


Mga duwang bulan palang an nakakaagi an DPWH Bicol na pinamamayohan ni regional director Virgilio Eduarte enot nang nagpadara kan kaparejong facilidad sa Camarines Norte, Albay asin digdi sa Camarines Sur.


Bako lang Camarines Sur an pigtabangan kan DPWH Bicol alagad kabale an Albay na nakarecibe nin katorceng container van asin katorce man sa Camarines Norte.


An OPABA naghagad nin tabang ki Senador Bong Go na masuplayan nin face mask, alcohol asin iba na dai nahaloy nag-abot na an diez mil pidasong 95 face mask asin igwa man pigpadarang suhay na suplay para sa PNP bilang mga frontliners. (DPAureus)