DSWD igwa bersyon sa tios na provincia sa Bicol

An Department of Social Welfare and Development (DSWD) sa Bicol igwa man nin bersyon sa isyu sa ‘‘poorest of the province’’ sa rehiyon base sa saindang pinaluwas na datus kan Deciembre 2021 na naglilinaw sa nagluwas na mga bareta sa social media na an Camarines Sur iyo na an pinakatios na provincia sa rehiyon Bicol.


An enot na report hale man sana sa saindang ahencia sa ginibong Media-Forum kan Deciembre 2021, an field office nagpahayag na inisyal pa sana an resulta kan National Housing Targeting System or Listahan 3 Survey sa numero kan mga tios na familia sa rehiyon Bicol.


Sinabi pa an Listahan nagseserbe na basehan sa identification of beneficiaries sa mga programa kan DSWD siring kan Pantawid Pamilyang Pilipino Program (4Ps), Social Pension Program (SLP), asin iba pa, alagad saindang piglinaw bakong ‘‘poorest province’’ an Camarines Sur sa rehiyon Bicol.


Segun pa sa saindang pig-post na bareta an ‘‘Listahan datasets’’ iyo sana an mga numero kan mga tios na familia sa geographic area asin bakong basehan para sa isyu sa pinakatios na provincia sa rehiyon.


Sainda pang pinadatulan an datus kan Philippine Statistics Authority, an Masbate asin Camarines Norte an pinakatios na provincia sa Kabikolan.


An report sa pinakatios na provincia sa rehiyon Bicol saro sa nagiging isyu sa politica sa Camarines Sur. Sa ginibong tiripon kan Anduyog party na presente si Bise Presidente Leni Robredo pigbuyagyag ni dating congressman Nonoy Andaya, candidato para gobernador na an Camarines Sur iyo na ngunian an pinakatios na provincia sa rehiyon base sa pinakahuring survey kan Philippine Statistics Authority sakop an premirong cuarto kan 2021.


Pig-omaw niya kan panahon ni Gobernador Jose Bulaong, pigkukunsiderar na an provincia pinakamayaman sa rehiyon, sa punto na halangkaw an produksyon nin paroy asin niog sa Camarines Sur. Maging man sa sektor nin parasira halangkaw an saindang produksyon.


Alagad pakatapos nin trienta anyos kan ‘‘crab mentality’’, fake news asin iba pang pangba-braso sa mga kalaban na politico an provincia saro sa maluya an pag-asenso kan economia sa nasyon.


Namumundo si Andaya na nalampasan kita kan Masbate asin Sorsogon.