DTI CamSur nag-iinspeksyon kan mga depalitong produkto

Naglilibot an Department of Trade and Industry (DTI) sa Camarines Sur tanganing mag-inspeksyon sa mga establisimiento de negosyo na nagpapabakal nin mga depalitong produkto siring kan mga Christmas lights maging iba pang dekorasyon ngunian na pasko orog na si nag-iilaw asin iba pang produkto kabali na an materyales sa konstruksyon.

Alagad poon kan Oktubre saka ngunian na bulan nin Noviembre 2023 negativo pa sa mga nasisikop na depalitong produkto.

Ini an mga pahayag sa Bicol Mail ni Provincial Director Jay Ablan na nagtutubod an opisyal na posibleng mayo nang madakop huli kan mga ginigibong seminar kan ahencia sa mga establisimiento kan tamang pag-angkat nin mga produkto sa supplier na dapat seguradohon igwang Import Commodity Clearance o ICC sticker.

Sa mga nag-aatendir sa saindang pa-seminar naririsa ninda na interesado kan discusyon kan kahalagahan kan ICC sticker nganing mapatama na an saindang pagkua nin produkto sa supplier asin dai na madakop kan ahencia sagcod na mapinaran nin multa, sabi pa ni Ablan.

Ginigibong pa-seminar kan DTI CamSur sa pamamayo ni PD Jay Ablan sa mga hardware owners sa Product Standards sa District 3 kan provincia nganing matukdoan an mga negosyante na segurohon bakong depalitong produkto an saindang inaangkat sa suppliers. (DTI CSur)

Nag-opresir pa nin tabang an ahencia na kun mawot maseguro na bakong substandard an produkto magpasiring sa saindang opisina provincial nganing helingon asin tukdoan.

Igwang constant enforcement an ahencia na kinababalihan kan national level na iyo an naglilibot sa mga rehiyon nganing aramon kun igwang ginigibong aksyon sa mga substandard product mantang sa regional level sinda man an nalibot sa mga provincial office sa kaparejong misyon.

Magigirumduman kan nakaaging bulan maabot sa P500,000 na cantidad kan manlaen-laen na depalitong produkto na saindang nakumpiskar sa Ciudad nin Naga asin iba pang mga banwaaan na pigrunot sa natad kan City Hall.

An mga produkto kinababalihan kan wire, toilet bowls, may dayang kilohan, Christmas lights, sanitary wares, asin materyales sa konstruksyon.

An aksyon pinangenotan kan DTI director asin presente man an opisyales lokal kan Ciudad nin Naga.