DTI sunodsunod an linyada nin mga feria
- 8 hours ago
- 2 min read
Ni Sonny Malate
Labing 60ng Small and Medium Enterprises (SMES) gikan sa bilog na probinsya an nagparticipar sa piglatag na food fair na pigpadrinohan kan Department of Trade and Industry (DTI)-CamSur sa pamamayo ni Provincial Director Jay Percival S. Ablan.
Sa ginibong Feria de Camarines feat. Delicioso sa sarong mall sa ciudad kan Naga kan nakaaging bulan, kairiba digdi an mga entrepreneur hale sa Goa, Tigaon asin Tinambac na an lambang saro may sadiring pambihirang pigtampok na productong kakanon.
Inatendiran ini kan oficiales kan DTI asin ibang ahencias, representatantes kan negocio asin sari-saring sector saka mga entusiasmadong individual sa mga dati asin bagong sistema sa culinary arts.
Segun ki Raven N. Bricia, DTI Business Counselor kan Goa asin San Jose, an actividad may obheto na orug pang mabisto an producto kan mga SMEs, maparambong an saindang kaaraman asin makaguno nin dagdag kabuhayan.
Gikan sa mga estudiantes sa BS Entrepreneur sa sarong pribadong escuelahan sa Tigaon, nakaagaw nin atencion an flavored laing chips. Naiiba sa tradicional na laing kan Bicol, ini an maragsip, kawiliwili asin convenienteng singasingaon o panhimagas.
Apwera sa naiibang productong ini, an mga estudiantes nakagibo man nin harina hale sa batag. Ini an ginigibong polvoron asin iba-ibang klaseng managom na mamon.
Sa mga taga banwaan kan Tinambac yaon man an binotilyang pigpreservar na aligi kan a'nit (crab). An productong ini tamang tama sa mga taga Bicol na mahilig sa dagdag na maharang na panimpla sa saindang panira.
An mga entrepreneur hale sa Goa nagpahiling liwat kan saindang productong herbal. Mga productong gikan sa local na pananom an kinawilihan kan mga consumidores na nagdalaw sa food fair.
Mientrastanto, kan Mayo 14 hasta 17 ginibo liwat an taunan na Orgulyo kan Bikol Trade Fair sa sarong mall sa ciudad kan Mandaluyong. Siring kan dati, an actividad nagpahiling kan actibong taragboan kan cultura asin passion sa paghimo nin mga oragon na productong Tatak Bikol.
Magpoon sa midbid na pili, home decor, wellness products asin sari-saring pig-oorgulyong producto kan Bikol, an feria nagpahiling kan bibong interaction entre kan mga entusiasmadong entrepreneur asin consumidores magin local o dayohan.
Pigbuyagyag man ni Bricia na sa bulan na Hunyo ilalatag liwat kan DTI an feria sa ciudad nin Naga para sa muebles na gibo sa kahoy, huyo, nito asin ibang local na material na abunda sa localidad.
Apwera sa paglatag nin mga feria, an DTI padagos man sa saindang mandato sa pagbusol kan derechos asin responsibilidad kan consumidores.
Siring man, sa pagbusol kan patas na sistema sa negocio, seguridad kan mga producto asin pagtulod sa kapakanan kan consumidores na makaguno nin bastanteng kaaraman asin maggibo nin tamang pagpili asin desisyon.
