DTI suportado an mga negosyante, entrepreneurs

Ni Sonny Malate

Sustenido an pig-eextendir na suporta kan  Department of Trade and Industry (DTI) - Camarines Sur sa pamamayo ni Provincial Director Jay Percival S. Ablan sa mga negosyante asin entrepreneurs sa bilog na probinsiya.

Sa banwaan kan Goa asin San Jose, sa paagi ni Raven N. Bricia, Business Counsellor sa DTI Negosyo Center  kan duwang banwaan, an ahencia padagos sa pagduhol nin  mga serbisyo sa sector kan negosyo asin Small and Medium-sized Enterprises (SMEs) digdi.

Segun ki Bricia na natukahan sa presenteng katungdan niya kan nakaaging Enero, padagos an mga skills training, seminar, technology transfer asin linkages para sa mas mahiwas na mercado asin burabod nin pangangaipo financial sa hababang interest rate.

Pig-apreciar kan huben na Business Counsellor an higot na suporta ninda Alkaldesa Raquel S. Lim asin Alkalde Jerold B. Peña na pig-eextender para sa kapakanan kan mga negosyante. Segun sa saiya an LGU Goa maalocar  nin fundo para sa mga  programa kan DTI sa banwa.

Particular man na nahiling ni Bricia an dakulang potential kan San Jose na sa tamang oportunidad asin asistencia kan gobyerno local, an negosyo digdi  piglalaoman  na magiging actibo asin progresibo arog sa Goa, an centro kan comercio sa Partido Area.

Sa San Jose, saro sa mga SMEs na nanotaran kan DTI sa pagkakaiguang  dakulang potential sa handicraft business iyo an Craftotoy  Handicraft Manufacturing na pagsasadiri kan mag-agom na Bensalip (Totoy) asin Mercedes (Beng) Paa.

An mga productong home saka office furnishings  na solosolong piggigibo ni Totoy gikan sa mga material na abaca, nawi asin nito na abunda sa Partido Area. Ini may pambihirang gayon, calidad saka desinyo kaya makusog an benta sa mga customer. 

Si Totoy nahasa sa paggibo nin mga handicrafts magpoon pa kan decada 80 kan nagtrabaho siya sa Metro Manila sa sarong exporter nin handicrafts.  Pag-uli kan mag-agom sa Bicol durante kan Covid Pandemic saka sinda nagpoon kan sadit na handicraft business. 

Sa paagi kan transaction na on-line sa social media nabisto an Craftotoy kaya naghiwas an mercado kaini. Dagdag pa digdi an pagbale sa trade fair kan DTI asin KADIWA ng Pangulo sa Goa asin San Jose. Sa ngonian, may mga native products  sinda na nakaabot na sa ibang nacion.

Sa presente, an pighuhurot kan mag-agom iyo an magkaiguang  awmento sa capital para sa  dagdag na trabahador asin pagbukas nin outlet kan producto ninda harani sa  residencia ninda sa Zone 1, Sitio Bilog, barangay Danlog na nagseserbing work area asin showroom. 

An mag-agom entusiasmado na  makabale liwat  sa Feria de Camarines kan DTI dapit sa wearables asin home styles  sa  Junio sa ciudad nin Naga  asin National Trade Fair sa Manila masunod na taon.

Mientrastanto, saro pa sa mga  SMEs na suportado kan DTI iyo an Manuel's Garden Integrated Farm sa Pinaglabanan, Goa,  pagsasadiri kan retiradang titser na si Salvacion C. Garchitorena. Ini  an actibong manufacturer nin tsa (tea) gikan sa local herbal plants, native delicacies asin fruit juices. 

An tataramon nin inspiration hale sa DTI Business Counsellor para sa kagsadiri kan duwang SMEs asin pag-iriba ninda - manteniron an passion, dedikasyon asin tamang diskarte sa negosyo tanganing  padagos na maging mauswag ini.