DTI suportado an One Town, One Product kan LGUs
Ni Sonny Malate
Pigpahayag ni Jay Percival S. Ablan, Provincial Director kan Department of Trade and Industry (DTI) Camarines Sur na bilog an suporta kan ahencia ninda sa programang One Town, One Product (OTOP).
Pigtawan niyang doon na an napiling OTOP kan sarong localidad dapat nagtataong onra, orgulyo kan ginikanan na lugar asin nagrerepresentar kan cultura saka pangkabuhayan na actividad asin economia local.
Segun ki Ablan an OTOP na flagship program kan DTI pigpipili kan sarong lugar base sa presencia kan raw materials, bastanteng numero kan tawong invuelto digd, kaaraman kan mga namamanwaan dapit kaini asin potential sa mercado local o international.
An OTOP pinapusog sa paagi kan RA 11960 o One Town, One Product Philippines Program. Obhetos kaini an itulod an mabaskog na economia sa comunidad, magcrear nin dagdag na trabaho asin ibusol an local entrepreneurship. Dagdag pa an pauswagon an traditional na kakayahan bilang actibong negosyo sa local asin pangkinaban na mercado.
Susog ki Ablan, an local na gobyerno kan banwa o ciudad an madeclara kun anong producto o servicio an saindang pipilion bilang OTOP sa paagi nin ordinansa sa lehislatiba local. Maggibo man nin consultaciom, intervention asin katakod na mga actividad sa paghaman kaini.
An DTI an mayor na ahencia na nagsusupervisar kan OTOP sa asistencia kan Department of Science & Technology (DOST), Department of Agriculture (DA) academe asin pribadong institution saka mga stakeholders.
Sa paagi kaini, nagkakaiguang pagtatarabangan asin cooperacion sa comunidad para sa pagrambong kan small,and medium sized enterprises (SMES) kasabay an pagtalubo kan cultura sa localidad.
Sa presente, an DTI an nag-aasiste sa mga LGUs para orug pang mag-uswag an napili OTOP. Ini sa paagi nin skills training, linkages sa financial institutions, tamang exposure asin pusog na mercado para digdi sa paagi kan DTI Negosyo Center.
Nagkakapirang midbid na OTOP iyo an pinangat kan Camalig, Albany, pansit bato kan Bato, Camarines Sur asin Hilot kan banwaan na Magarao. Sa Partido Area pinakahuring nadeclarang OTOP iyo an tinuktok con galyang kan Goa.
Mientrastanto, maogmang pig-anuncio kan DTI na an ika-limang edition kan Feria de Camarines gigibohon sa luwas kan probinsya, Agosto 20 -23, 2026. An venue sa sarong midbid asin dakulang mall sa ciudad kan Mandaluyong.
Inaapod "Feria de Camarines Goes to Shang" an prinerong out-of town version kan fera sarong bibong celebrasyon kan talento asin tibay kan Bicolano sa pigcrear nin mga productong de calidad. Mga entrepreneurs sa iba-ibang producto local an maparticipar digdi.
Tampok sa feria iyo an ''La Vida Coco" na mababakal an mga productong gikan sa niyog kairiba na an kakanon, inomon, beauty products asin pang adorno sa harong asin oficina.
Sa bulan na Septiembre magigin sibot man an DTI Bishop Francisco Gainza Trade Fair. An taonan na actividad minatampok kan magagayon na productong orgulyong gibo sa Bicol.
Comments