Dugang na Army Battalion pinadara sa Masbate-9th ID

Nagpadara nin dugang na sarong batalyon kan mga soldados an 9th Infantry Division (9th ID) kan Armed Forces of the Philippines sa Masbate nganing iwarak an saindang mga operasyon sa natatada pang kumunistang grupo asin pagmantenir kan paz y orden sa maabot na eleksyon sa provinciang ini.


Alagad bako lang laban sa insurhencia an saindang misyon envez makakatabang pa sa pagmantenir kan paz y orden sa maabot na eleksyon lokal asin nasyonal sa Mayo 9, 2022 mantang an Masbate parating may halangkaw na caso na may relasyon sa eleksyon.


Si Major General Alex Luna, Commander Officer kan 9th ID sa Bicol na may base sa Camp Elias Angeles, San Jose, Pili, Camarines Sur saiyang pinadara an tropa kan 9th Infantry Battalion sa pamamayo ni Lt. Col. Benjie Lonogan.


Dugang na fuersa sinda sa duwang batalyon sa islang provincia kan Bicol na igwa na gabos nin tolong batalyon kan mga soldados.


Ini an mga pahayag sa Bicol Mail ni Major John Paul Belleza, opisyal na parataram kan 9th ID mantang pigtatawan ninda nin prioridad na halughogon na an natatada pang nasa 30 hasta 40 por cientong rebeldeng New People’s Army sagcod na taposon ninda an giyera laban sa insurhencia.


Kan mga nakaaging manga bulan sunod-sunod nang mga rebeldeng NPA an nagbabalik na an saindang grupo sa gobierno envez saindang kinukundenar an mga nangyayari sa laog kan organisasyon kan kumunista asin mayo pa sindang futuro kun dai tutuwadan an pakikipag-laban sa gobierno.


Maging man an ordinaryong namamanuan nagco-cooperar na sa soldados kan gobierno contra sa CPP/NPA, sabi pa ni Belleza.


An insurhencia saro sa naghahasok nin kariribokan sa Masbate maging kun panahon nin eleksyon sagcod na nag-iimponer nin permit to campaign asin permit to win sa mga nagcacandidato.


Alagad an militar asin Philippine National Police sa Bicol nagpapatanid sa mga candidato na dai magbayad kan PTC asin PTW huli ta puedeng sangatan sinda nin caso.


9th ID kan AFP nagpadara nin dugang na mga soldados sa Masbate nganing dugangan an fuersa laban sa CPP/NPA asin magmantenir kan paz y orden sa maabot na eleksyon. (Major J.P. Belleza)


Magkakaigwa nin pag-monitor an PNP asin PA sa posibleng operasyon kan rebeldeng NPA nganing makakolekta alagad an mga politico pinapatanidan kan awtoridad.


Sa Camp Semion Ola kan Bicol PNP sa Ciudad nin Legazpi, Si Brig. General Jonnel Estomo nag-aandam na magpadara man kan saindang augmentation force sa Masbate.


Sa record kan PNP kun panahon nin eleksyon dakul an mga insidente nin kriminalidad sa Masbate sagcod na napadara sinda nin dugang na fuersa nganing makatabang sa pagmantenir kan paz y orden.


Mientras tanto, nag-atubang an mga opisyal kan 9th ID sa sarong forum sa mga estudiantes kan Tiwi Community College nganing saindang ipaliwanag an kararatan dara kan insurhencia sa mga jovenes.


Mayong futuro sa paglaog sa organisasyon o magbale sa CPP/NPA an marhay na futuro atendiran an saindang pag-adal para sa saindang futuro sa edukasyon.