Dugo karibay kan multa sabi sa ordinansa

Iginigilid na kan City Hall an pag-imponer nin multa nin cuarta sa mga nagbabalga nin ordinansa na may relasyon sa coronavirus disease envez magdonar na nin dugo makakatabang pa sa kakulangan stock nin dugo sa mga hospital.

Igwang pinapasunod na ordinansa an lokal na gobierno kan ciudad na papamultahon nin P2,000 hasta P3,000 an nadadakop na dai nagsusulot nin face mask asin dai nagsusunod sa social distancing alagad huli kan pandemya asin dakul an mayo nin mga trabajo pinag-marhay na magpasar nin ordinansa na envez kan cuarta dugo na sana an dapat imulta.

Si Consejal Joselito Del Rosario, author kan ordinansa nagsabi haros aro-aldaw may nadadakop an Naga City Police Office asin Public Safety Office na apesar kan pandemaya alagad igwa pang mga nagsisinutil magsulot face mask asin mag social distancing. Kabale digdi sa mga nagkakadarakop iyo an pagbalga sa ordinansa sa bawal na group drinking.

Katuyohan kan ciudad segun ki Del Rosario nganing mapugolan an padagos na paglangkaw kan caso sa Covid-19 an Sangguniang Panlungsod nagpasar ordinansa nganing-iimponer an voluntary blood donation bilang alternativong areglo sa pagsinutil sa ordinansa.

An ordinansa numerado 2021-058 inaprubaran kan Hulyo 13, 2021 na author si Del Rosario ‘‘An ordinance prescribing voluntary Blood Donation as settlement of Covid-19 – Related Apprehensions in Naga City.”

An Naga City Hospital autorisado na maglaog sa memorandum of agreement sa arin man na blood testing center nganing iyo an magproceso sa pagkua nin dugo.

Sagcod sa 500 cc an dapat idonar alagad kun ‘‘multiple violations’’ an ginibo kan pasaway sa paagi kan saiyang immediate kins iyo an mag-areglo sa laog nin sarong semana nganing iyo an magdonar nin dugo.

Matapos makumple an blood donation, an violators tatawan nin sertipikasyon kan Naga City Hospital na isusumiter sa Public Safety Office. An PSO cacansilaron an pig-isyu nin ticket.

Alagad dinagdag pa ni Del Rosario na si dai makaka-donar nin dugo dapat magbayad nin multa bilang penalidad sa pagsinutil base ordinansa na may relasyon sa Covid- 19. (dpa)