DUTERTE NAGPAPAPANSIN LANG-CONSEJAL DEL CASTILLO: United Muslim sa Bicol dai makikiaram sa secession

An United Muslim Communities (UMC) sa Bicol na igwang diez mil na miembros nanindugan na dai sinda makikiaraman sa isyu sa pangapodan ni dating Presidente Rodrigo Dutere na secession o magsuhay an Mindanao sa Visayas saka Luzon.

Sa entrevista kan Bicol Mail ki Mike Mustapa, vice president for external kan UMC sa rehiyon Bicol ‘‘Dai kami mapaluwas nin komento pabor man o contra dawa an samong grupo digdi sa Bicol haling Mindanao envez neutral an samong panindugan’’

Alagad sa saiyang huring-huding sa mga Muslim sa Mindanao sa pakikiulay sa paagi nin telepono nagpapabor na magsuhay na an saindang rehiyon sa Filipinas.

An mga namamanuan sa Mindanao, Visayas asin Luzon gabos Filipino, sabi pa.

Nagtutubod sinda na an iba pang mga Muslim Communities sa ibang rehiyon imamantenir an pagiging ‘neutral’.

An saindang grupo sa rehiyon nagsasadiring mga sadit na negosyo nganing mabuhay na matuninong mas marhay an dai na makiaram sa isyu nasyonal.

DUTERTE NAGPAPAPANSIN LANG – CONSEJAL DEL CASTILLO

Sarong miembro kan Sangguniang Panlungsod kan Ciudad nin Naga natuyawan an pagbutwa ni dating Presidente Rodrigo Duterte na ‘‘Nagpapa-pansin lang an naging pamayo kan nasyon.’’

Ini an mga pahayag ni CPA/Lawyer Consejal Salvador Del Castillo sa Bicol Mail sa tahaw kan pangapodan ni Duterte na dapat magsuhay an Mindanao sa Filipinas.

Si Duterte, sarong abogado na naging fiscal aram niya man na imposible an sinasabi niya. Sige an ribok kayan ta baka magpaluwas na nin warrant of arrest an ICC.

Mientras tanto, si Abogado Ricky Tomotorgo kan Bunyog nagsabi man na dai makakakua nin suporta an dating Presidente alagad an problema bakong marhay an gibo niya bilang dating pamayo kan nasyon na mangenotan.

An isyu sa pagsuhay kan Mindanao, sinimbag na ni Presidente Ferdinand Marcos Jr. na mayong mangyayari sa movimientong ini huli na malinaw na ‘‘unconstitutional’’. (dpa)