Duterte natatakot na sa progresibong grupo, sabi

Sinikwal sana kan progresibong grupo sa Bicol an akusasyon ni Presidente Rodrigo Duterte na ‘‘legal fronts’’ kan Communist Party of the Philippines an mga party-list sa irarum kan Makabayan Block na padagos suportado kan namamanuan Filipino.

‘‘Natatakot na si Duterte sa mga progresibong organisasyon sa tahaw kan dakula nang impact sa namamanuan Filipino na perang taon nang nagdadanay puon na itukdas an Party-list Act’’.

An dakulang suporta sa sainda kan namamanuan Filipino iyo an kinakatakot ni Presidente Duterte kaya ngani hinahanapan nin dahilan alagad mayong nangyayari huli ta labi na sindang duwang decada alagad yaon pa sa congreso.

Ini an mga pahayag ni Nica Ombao, regional coordinator kan Gabriela Women’s Party sa Bicol kasunod kan mga banat na naman sa sainda ni Duterte.

Limang party-list groups an nginaranan ni Presidente Duterte na ‘‘legal fronts’’ kan CPP na kinababalihan kan Kabatan, Anakpawis, Bayan Muna, Alliance of Concerned Teachers, asin Gabriela.

An mga pahayag kan Presidente kasunod kan pagtubod kan National Task Force to End Local Communist Armed Conflict (NTF-ELCAC) sa mga pahayag kan saindang spokesperson for sectoral concerns and Communication Undersecretary Lorraine Badoy contra sa limang party-lists na kasabuwat kan CPP.

Loma na an isyu kan gobierno sa Makabayan Block apesar an saindang serbisyo sa gobierno sa paagi kan pagiging lehislador dakul nang mga leyes an naipasar asin kabale na sa mga acta republica. Nagkapera sana an naunambitan kan Gabriela Bicol siring kan pagkakapasar sa Solo Parent Act, Magna Carta for Daycare Worker asin dakul pang iba.

An Gabriela Women’s Party 21 anyos na sa congreso halaba na an listahan kan saindang mga naipasar na bill, mga napatukdok na health care center. Livelihood project maging sa infrastraktura.

Sinabi pa na an progresibong grupo na padagos nagkukusog sa masa iyo man an saindang boses sa congreso saka kritiko kan gobierno kun sala an saindang mga ginigibo mantang kabale sa saindang trabajo iyo an human rights advocacy.