Duwang rebelde gadan sa encuentro sa Masbate

Liwat naman nagkaigwa nin encuentro an soldados kan gobierno asin Communist Terrorist Group (CTG) sa provincia nin Masbate agang amay kan Lunes, Febrero 5 asin duwang rebelde an kumfirmadong binawian nin buhay.

Sa pinaluwas na press statement kan 9th Infantry ‘‘Spear’’ Division kan Philippine Army na may base sa Camp Elias Angeles, Pili, Camarines sur an bakbakan nangyari alas 7:00 nin aga kan magsagupaan an mga soldados kan 2nd Infantry Battalion an maabot sa sampolong CTG o dating inaapod na rebeldeng New People’s Army na binistong miembro kan Platon 1, Komiteng Larangan Guerilla South, Sub Regional Committee 4 na inabot nin mga diez minutos an pabalyohan nin putok.

Dai pa pinapaluwas an pangaran kan duwang rebelde na binayaan kan mga pag-iribang NPA mantang nagkakaigwa pa nin operasyon sa posibleng nakadulag na grupo.

An lugar na tinowadan kan mga kalaban kan gobierno toyong iwinalat an mga armas na kinababalihan kan sarong M-16 rifle, sarong calibre .38 revolver, sarong homemade shotgun, limang cellphones, asin mga personal na kagamitan.

An Masbate, saro sa provincia sa Bicol na igwa pang problema sa insurhencia na padagos pa an mga ginigibong operasyon kan tropa kan gobierno asin iba pang estratihiya nganing magsuko na sa gobierno an mga rebelde.