Duwang rebelde nagsuko sa PNP sa anibersaryo kan NPA

Sa tahaw kan ika-55 anibersaryo kan New People’s Army (NPA), duwang miembros an surprisang nagsuko sa Masbate 2nd Provincial Mobile Force Company kan Marso 29, 2024.

Sarong regular na miembro kan NPA asin sarong miembro kan Milisyang Bayan an matuninong na ‘‘nagbalik loob’’ sa tabang kan mga personaje kan Masbate Provincial Mobile Force sa pamamayo ni P/Lt. Col. Norlando Mesa, Force Commander. Kasabay kan pagsuko sa g obierno bitbit ninda an sarong kalibre .38 asin homemade 12 gauge shotgun.

An nagbalik loob magkakaigwang biyaya sa irarum kan Enhanced Comprehensive Local Integration Program (E-CLIP), na programa kan gobierno sa dating mga rebelde na kinababalihan kan NDF, NPF asin CPP para sa pagbuhay kan saindang familia.

An PNP Bicol sa pamamayo ni BGen Andre Dizon magpapadagos kan saindang serbisyo para sa pagkakasararo sa lindong kan bagong Pilipinas.

Mientras tanto kan Jueves Santo, Marso 28, 2024 besperas kan anibersaryo kan NPA mga alas 9:30 nin aga nagkaigwa nin encuentro an tropa kan 49th IB kan Philippine Army sa pigtutubodan na 20 rebeldeng NPA sa Barangay San Vicente, Jovellar, Albay alagad mayong pig-report na iredo o binawian nin buhay sa mag-ibong na lado.

Sa imbestigasyon kan 49IB an mga rebelde nagtitiripon bilang pag-andam sa saindang anibersaryo sa Marso 29, 2024 alagad na monitor sinda kan mga nagpapatrolyang tropa kan grupo.

Nagdurulag tolos an mga rebelde asin walat an saindang mga personal na kagamitan, bomba, dokumentos asin iba pa na yaon na ngunian sa kustodiya kan militar.