E-Sabong, E-Sugal



Sa mga pinangako ni Presidente Duterte kan siya kandidato antes kan 2016, kaya ako mahigos na nagkampanya asin nagboto para presidente (VP si Leni). Enot, dahil sa planong baguhon kuta an 1987 Cory Constitution, na ibalik an death penalty sa mga nagkokomitir nin maka-ngirhat na krimen arog kan may relasyon sa droga, mga mandarambong, mga paragadan asin paralupig. An pagbago kan sistema haling presidential/unitary pasiring federal system, an kampanya kontra korapsyon bako lang sa kaitaasan kan gobyerno kundi sa burukrasya, an pagkaka-igwa nin sadering independienteng foreign policy, an pagtindog bilang independiente asin soberanong nasyon na mayong kaiwal kundi amigo kan gabos sa kinaban.


Maski ngani dai ko segurado na magana siya kaidto, enot sabi ko makampanya ako na mayong karibay na trabaho o kwarta, kun maggana si Duterte maski ngani ako mismo duda na magana siya pero nag-programa ako sa radyo (pro bono) para ipagpaliwanag an saiyang plataporma de gobyerno alagad dai ko naghagad karibay maski trabaho sa gobyerno nin anuman na pwesto.


Dai nangyari an constitutional change o Cha-Cha dahil sa pagkontra wala too kan simbahan lalo na sa laog mismo kan Congreso, Camara de Representantes asin Senado. An korapsyon dai maoro-ontok ta hali sa mga tao mismo na iyo an sige an haragad nin pabor sa mga politiko.


An droga pigtrabahuhan na madakop an mga adik saka parabariwas kaini alagad dai maoro-ontok ta tambak an nag-aarabot na suplay hali sa luwas kan Pilipinas pasiring digdi sagkod sa Bikol asin Naga.


Totoong gulpi an mga pagbabago sa presenteng administrasyon kun ikukumparar sa mga naka-agui alagad saro sana an dai ko suno. An tungkol sa juego.


Marhay ngani ta nagka-igwa nin pandemya kaya hinigpitan an burulang asin tupada na pwedeng maguin kausa nin urulakitan nin Covid 19 virus kaya nag-oro-ontok ngonyan. Pero dakul pa an tupada sabi kan mga bareta sa radyo, an Baraha arog kan Tong it, Entre 4, Lucky 9, Black jack, Majong asin iba pa. Dakul pa nganing nagkaka-darakop sagkod ngonyan.


Mayo nang tiket sa sweepstake pero may STL na iyo pang pigkukunan na dakul na kwarta kan PAGCOR na paragastos daa kan gobyerno mga pambakal nin bulong kan may mga helang asin iba pang pan-ayuda sa kinapobrehan.


An problema ta an STL garo pamalo-malo lang sa jueteng na dai mo maintindihan kun arin talaga an nagtatao nin engreso sa gobyerno o pasiring sa bulsa kan pulis asin mga politiko.


An mga kuryador pati mayo nag sulot nin t-shirt na may tatak PCSO.


Pero maski paro-pano si mga kubrador na nawaran nin trabaho kan ini ipagbawal kadto, ngonyan harakag-hakag naman ta maka-kwarta lalo na kun nakakapa-gana.


Dahil ta ribong an balanak kun baga legal o illegal kaya napipiritan magtaraya aro-aldaw pati an mga mahilig sa swerte arog kan mga padi, paratukdo, negosyante asin mga pulis mismo. Asin bago ako malingaw pati mga politiko mismo.


An pinaka-grabe ining e-sabong. Kun tano ta pigtugutan yan kan gobyerno nasyonal por medyo kan Congreso, may prangkesa na si Atong Ang ta an saro sa mayor na autor iyo an sarong Bikolanong Congresista na mahilig magpara-panribay ni pangaran.


Ano tutugutan ta daw yan sa masunod na pirilian?