Ebalwasyon sa NCPM nagpapadagos afesar kan mga luak sa edificio

Tanganing malikayan an pagrampahog kan mga estraktura sa ciudad nin Naga dahil sa linog, pigkokonduser an ebalwasyon sa mga estraktura digdi na pigtuturuwangan kan City Engineer's Office at Philippine Institute of Civil Engineers (PICE).

An bagay na ini iyo an pigkunpirmar sa programang “Doble Pasada” sa DWNX ni Engr. Junmar Rey Aguilar, assistant city engineer. Alagad prayoridad ngonian sa pag-aadal kan saiyang oficina, kaiba an organisasyon, an Naga City People's Mall (NCPM) kun haen haloy nang nanutaran an structural deterioration huli sa kagurangan na man saudan.

Susug ki Aguilar, sa nasambit na ebalwasyon, maaaraman an mga aksyon na kaipuhan gibuhon kan gobierno local sa edificio kan mercado publico kabali na an retro fitting kun kinakaipuhan.

An resulta, piglalaoman na magluwas ngonian na bulan tanganing matawan rekomendasyon an city hall manungod sa mga dapat gibuhon sa NCPM.

Afuera digdi, pigheras man ni Aguilar an planong paglaog kan saiyang oficina asin kan PICE sa sarong memorandum of agreement.

Sa paagi kan pirirmahan kan MOA, magigin regular na an saindang pag-aadal sa mga nakatugdok na pribado asin pampublikong establisamento sa Naga.

Kan su año 1965-1969 pigtugdok an mercado, dating "Naga City Public Market", sa lindong pa kan termino ni dating alcalde Ramon Felipe, Jr. asin pig-agi sa inagurasyon komo pinakaenot asin pinakadakulang single-roof market sa Asya.

Paulo DS. Papa