ECs sa CSur nagpalangkaw na nin tarifa sa kuryente

Apektado na an mga electric cooperative (ECs) sa sunod-sunod na paglumpat kan presyo nin petrolyo nagpalangkaw na kan saindang tarifa sa kuryente asin igwa naman sasapoon an miembros-consumedores na dugang na tarifa sa electric billing para sa bulan Marso.


Sa Camarines Sur II Electric Cooperative (Casureco II) nagpalangkaw na nin singil sa tarifa na nagcacantidad 50 hasta 60 centavos cada kWh kan Febrero asin ngunian na Marso igwa naman sunod na palangkaw nin tarifica.


Si Rinner Bucay opisyal na parataram kan Casureco II nagpahayag sa sunod na meter reading sa consumo sa kuryente sa mga miembros-consumedores sa saindang mga coverage area sa Marso 19, 2022, posibleng magpatong naman nin 80 centavos sa cada kWh.


Kan bulan nin Febrero an singil sa residential – Php12.0038 kWh, sa commercial – Php11.1285 asin sa industrial – Php10.1295.


Saiyang sinabi na dai ninda kontrolado an barakalan kan presyo nin kuryente afuera kan padagos na pagnipis sa suplay kan kuryente apektado na kan pagparalangkaw kan petrolyo huli kan giyera sa Russia asin Ukraine.


An pagkulang-kulang nalangkaw man an demand na nagiging resulta sa pag-ulanto kan presyo asin an huring apektado iyo an consumedores.


Segun pa ni Bucay na an paglangkaw sa generation charge dai kontrolado kan mga cooperativa nin electricidad na digdi na napakol an paglangkaw kan presyo hale sa saindang supplier.


Iba kun sa capital expenditures asin maagi ini sa Annual General Membership Assembly (AGMA), sabi pa kan Casureco II.


Kabale pa sa angrangay iyo an paglangkaw kan presyo sa mga imported na oring na ginagmit sa pang gatong nganing makaproducir nin kuryente.


An ibang mga cooperativa nin kuryente sa Camarines Sur nagpaluwas na kan saindang aviso siring kan Casureco III sa Rinconada district mantang sa Camarines Sur I Electric Cooperative (Casureco I) nag-implementar na kan dugang na tarifa asin an mga dahilan iyo an pagnipis kan suplay nin kuryente, produkto nin petrolyo asin nagpalangkaw naman nin presyo cada kWh an saindang power supplier.


Si saindang tarifa sa residential kan Febrero Php9.9151 naglankaw nin 38 centavos asin 39 centavos sa low voltage mayo pang kumfirmasyon kun igwa naman masunod ngunian na Marso.


An National Grid Corporation of the Philippines (NGCP) nagpaluwas na nin aviso sa pagnipis kan suplay na magiging dahilan kan mga rotational brownout. (dpa)