ECs sa CSur nagpalangkaw nin tarifa sa kuryente

An mga miembros consumedores kan mga electric cooperatives (ECs) sa Camarines Sur mapasan kan halangkaw na tarifa sa kuryente epektibo kan bulan nin Hunyo 2026 na pigdadahilan iyo an paglangkaw kan generation charge.

Aprubado kan Energy Regulatory Board na binabakal kan ECs sa saindang mga power suppliers asin ipapasa man kan ECs sa mga miembros consumedores na bako lang digdi sa Camarines Sur envez sa iba pang provincias kan Kabikolan asin rehiyon.

An mga ECs siring kan Casureco I nagkumfirmar na si dating tarifa ninda kan Mayo 2026 sa Residential nagcacantidad nin P10.4276k kWh asin sa ngunian P12.4467kWh, sa Low Voltage hale sa dating P10.4276kWh sa ngunian P11.3853kWh mantang sa Higher Voltage sa ngunian P10.5136 hale sa dating P9.5691kWh. Sa Casureco II na dating may pinakahababang tarifa sa ECs sa nasyon nagsabay na mala ngani para sa bulan nin Hunyo 2026 sa Residential cantidad na nin P12.5913, sa Low Voltage, P11.7098kWh, asin sa Higher Voltage, P10.3713kWh. Sa Casureco IV poon kan Hunyo 2026 sa Residential, P11.3267kWh, sa Low Voltage, P10.5397 asin sa Higher Voltage – P8.3378.

An parating dahilan kan mga power suppliers na nagpalangkaw sinda kan generation charge huli sa pagkulang kulang nin suplay nin kuryente epekto kan El Niño.

An nangyayari nadeclara nin Yellow asin Red Alerts, na napipiritan mag-implementar nin rotational brown out nganing mamantenir an suplay kan kuryente .

An dahilan man kan ECs kun nagpapalangkaw tarifa nagmahal an suplay nin kuryente kan saindang power suppliers asin ipapasa man sa miembros consumedores.