ECs sa Kabikolan apektado kan rotational brownout

Sagcod na padagos na nasa Yellow asin Red alert an Luzon Grid apektado an gabos electric cooperatives (ECs) sa Bicol sa Manual Load Dropping (MLD) o rotational brownout poon sa treinta minutos hasta sa duwang oras.

Mayo sa kontrol kan ECs envez sa National Grid Corporation of the Philippines (NGCP), segun sa paliwanag kan ibang cooperativa nin electricidad sa Camarines Sur.

Nagiging surprisa an rotational brownout huli ta napaluwas nin anuncio sa ECs an NGCP nangyayari na an brownout, sabi pa.

An pagpasa-irarum sa Yellow asin Red alert kan Luzon Grid huli sa pagnipis o kakulangan sa reserbang kuryente na nalangkaw man an ‘demand’ ngunian na panahon nin El Niño.

Sinabi pa na an epekto kaini, naglalangkaw an presyo sa kuryente kan mga power suppliers kan saindang pinapabakal na suplay sa ECs.

An nangyayari an miembros-consumedores kan cooperativa pinapasahan an halanglaw na singil sa tarifa mala ngani gabos na cooperativa sa rehiyon halangkaw na an saindang pig-iimponer na tarifa sa residential, low voltage asin high voltage.

Haros gabos na mga ECs sa Luzon asin Visayas bako lang sa Kabikolan apektado kan pig-dedeclarang Yellow asin Red alert.

Nagpatanid pa an kadakli sa manijamiento kan ECs na posibleng igua pang masunod na paglangkaw sa tarifa ngunian na Hunyo 2024.

Tanganing mapugolan an pagparalangkaw sa tarifa sinuspende kan Energy Regulatory Commission (ERC) an Wholesale Electricity Spot Market (WESM) sa pagpalangkaw kan presyo sa kuryente na saindang pinapabakal sa ECs.