Eksena kan Arte sa Partido Area buhay na buhay
- 3 days ago
- 3 min read
Ni Sonny Malate
Makolor, bibo asin buhay na buhay an eksena kan Arte sa distrito kan Partido urog na kan bulan na Junio. Ini nagpapahiling kan mayaman na istorya, cultura, unidad, pagtubod asin espiritu bilang sarong comunidad kan mga namamanwaan digdi.
Kan primerong parte kan Junio, nahimo an duwang darakula - 8 ft x 16 ft kada saro - mural art piece sa banwaan kan San Jose pakatapos nin haros tolong semanang ini pigmaigotan na mahaman. An mga piyesa commissioned project sa local na gobyerno sa liderato ni Alkalde Jerold B. Peña.
An United Visual Artists in Partido (UVAP) sa pamamayo ni Rodge Merabil iyo an pinagkatiwalaan kan gobyerno local kan duwang mural art piece na naglaladawan kan mayor na pagbuhay sa San Jose - pag-oma asin pagsira.
An pinakadakulang piyesang mural sa Partido Area ngonian ilalatag sa may hagyanan pasakat sa ikaduwang eskalon kan suanoy na edificio municipal kan banwa. Ini piglalaoman na magigin pambihirang socio-cultural art icon sa San Jose asin kataraid na banwa.
Kan Junio 12 hasta 14 saka petsa 19 sundong 26, piglatag man sa commercial building kan Pamilya Rellora-Monasterio sa banwaan nin Goa an Silyab 3: Art and Photo Exhibit and Trade Fair.
Tampok sa event iyo an mga piyesa, musica asin makolor na dadalanon gikan sa Partido Artists Group (PAG). An mga magayon na piyesa naipabakal sa mga art enthusiasts. Lider kan multi-artists goup si David Con Monserate Rivero kan famosong social media icon na Let's Go Partido.
Sa ikaduwang eskalon kan kaparehong edificio, pigpresentar man kan Salingoy Art Group an art exhibit na inapod "Saluysoy" kan Junio 18 hasta 20. Arog kan mga enot na art exhibit kan grupo, apreciado kan mga local art lover an mga piyesa kan midbid na local artists.
Nagparticipar sa art exhibit kadaklan mga taga Naga na miembros kan bistadong art group na tinugdas kan Bicolanong international artist Maestro Pancho Piano. Si Piano na yaon mismo durante kan event sarong pig-oorgulyong aki kan Barangay Mangogon, Lagonoy.
Dagdag pa sa may pangaran nang artists gikan sa Partido Area na kabale sa grupo iyo sinda Nelson Pintor Enciso kan Goa asin El Tagle Margate kan Lagonoy na ngonian actibo sa art scene sa Metro Manila.
An duwang art event sa banwaan nin Goa ginibo katakod sa celebrasyon kan kafiestahan ni San Juan Bautista kan Junio 23 -24. Ini an nagdarang dagdag na kolor sa mga linyada nin actividades na pigtampok sa taonan na celebrasyon.
Mientrastanto, nagpahayag nin kaogmahan asin pasasalamat si Merabil, Fundador asin Presidente kan UVAP, ki Alkalde Peña sa tiwala na pigtao sa saindang grupo sa paghaman kan duwang mural art piece sa San Jose.
Sa suporta kan alkalde, duwa pang darakulang art projects dapit sa pagtubod asin cultura an hahamanon sa maabot na mga bulan kan grupo na componido nin mga huben asin beteranong visual artists sa magkataraid na banwaan sa Partido Area.
Manonotaran na haros gabos na local na gobyerno sa Partido Area an iguang mga mural projects asin iba-ibang art events saka competition na maogmang pigpaparticiparan kan mga local artists.
Sa actibong suporta asin pag-apreciar kan comunidad sa mga local artists sa iba-ibang art genre, piglalaoman na an eksena sa Arte sa distrito padagos na magigin buhay na buhay asin madanay hasta sa maabot na mga henerasyon.
Comments