Election Officers sa Bicol pigpunan nang ukagon

Amay nag-aandam an Commission on Election (Comelec) kan pagwarak kan saindang personajes para sa pirilian sa Mayo 9, 2022 nganing mahale an isyu sa ‘‘familiarity’’ sa sarong ciudad asin municipalidad pigpunan nang ukagon an mga opisyales kan commission.

Digdi sa Camarines Sur, Camarines Norte, Albay asin Masbate pinunan nang ukagon an mga election officers asin provincial election supervisors.

Si Abogado Maico Julia Jr. Election Officer sa Ciudad nin Naga asin opisyal na parataram kan Comelec Camarines Sur nagpahayag kan nakaaging semana ginigibo sa paagi nin buronutan online kan saindang mga pangaran kun sain mababalyong destino.

Nakua ni Julia an Catanduanes bilang bagong destino asin sa Daet, Camarines Norte si Abogado Francis Nieves nakua niya an Naga asin digdi na siya madedestino.

Si Camarines Sur Provincial Election Supervisor Abogado Noriel Badiola nabunot niya an Masbate na bagong destino mantang si Albay Provincial Election Supervisor karibay niya sa Camarines Sur.

Ma-epekto an saindang bagong destino posibleng sa Noviembre 2021 alagad defende sa pinakahuring memorandum kan saindang central office kan commission.

Sa mga election officers sa 35 municipalidades asin Ciudad nin Iriga matalaan sinda kan suhay na buronutan online alagad an saindang destino uukagon sa limang congressional district kan provincia.

Maging an mga regional director kabale man sa mga babalasahon, sabi pa ni Julia.

Sa nagpapadagos na continuing registration segun pa sa parataram kan Comelec magdedefende na sa saindang main office kun papalawigon an voters registration matapos abuton nin sarong bulan na suspendido an pagpalista sa Ciudad nin Naga mantang nasa lindong kan MECQ puon kan Hunyo 15 hasta Hulyo 15.

Sa natatadang sarong bulan asin kinse diyas na rehistrasyon nagdadakul na an nagpapalista sa mga opisina kan Comelec mientras na sagcod na sana sa Septiembre 30, 2021 an voters registration.

Sa Oktubre 1 hasta 8 iyo na an pagplantiar kan mga candidato lokal asin nasyonal nin certifico de candidatura. (dpa)