Election officers sa CSur vspag-uktaba naman kan BSKE

Sinisikwal kan mga election officers sa Camarines Sur an propuestong senate bill ni Senador Francis ‘Chiz’Escudero na nagpapalawig pa kan termino kan opisyales de barangay asin Sangguniang Kabataan sa limang taon asin italaan an eleksyon sa Noviembre 2028.

Sa Ciudad nin Naga, si Election Officer Atty. Maico Julia Jr. maging iba pang mga election officers sa provincia nagpahayag na grabe na an saindang ginibong pag-andam para sa pigtalaan na Barangay Sangguniang Kabataan Elections (BSKE) sa Noviembre 2, 2026 mala ngani an mangyayari kaini kun i-uktaba ciertong dagdag naman na gastos kan pag-andam sa pirilian sa Noviembre 28, 2028 mantang pigtalaan man an election presidential sa Mayo 2028.

Milyones pesos na an ginastos kan central office kan commission masasayang naman an fondo kan gobierno, sabi pa kan mga elections officers..

An BSKE enot nang pigtalaan para sa huring semana kan Oktubre 2025 alagad pig-talaan naman kan congreso sa Noviembre 2, 2026 alagad ngunian dai pa giraray contento mawot naman i-uktaba. An dahilan kan senado huli kan krisis sa energia na bakong makatutubod.

Alagad sa Liga nang mga Barangay saindang pinapaboran nganing mapalawig an saindang posisyon asin an dahilan dakul pa sindang magiginibo.

Dakul nang ibang mga nag-aambisyon amay nang naglilibot para sa BSKE alagad nagtutubod sinda na dapat idagos an pirilian.

An Comelec nagpahayag pa na dai papaboran kan Corte Suprema an pag-uktaba naman kun mayong balidong dahilan.

Kun makapasar sa senado an propuestong bill kan Bicolanong senador asin cuestionon sa SC delicadong ibasura man sana mantang perang veces nang pig-uuktaba asin mayong naheheling na balidong dahilan.

Alagad sa lado kan Comelec kun ano an huri asin pinal na desisyon masunod sana sinda.