ELECTION PERIOD NAGPUON NA: 2K kapupulisan sa CSurpreparado na sa eleksyon

Sa pagsikad kan election period kan Enero 9, 2022 an Philippine National Police sa Camarines Sur nagcierto na preparado an saindang 1,776 na miembros kan PNP sa duwang ciudades kan Naga asin Iriga asin 35 municipalidades kan provincia.

Ini an pahayag ni P/Col. Bernardo Perez, Provincial Director kan PPO CamSur sa miembros kan media sa ginibong seremonya sa pagbugtak nin Comelec checkpoints sa pagpuon kan election period kan Enero 9, 2022 alas 12:01 nin maagahon. An kaparejong actividad ‘‘simultaneous’’ sa gabos na provincia asin ciudades sa nasyon.

Katuyohan kaini, nganing estrictong ma-implementar an Comelec gun ban puon Enero 9 hasta Hunyo 8, 2022 susog sa resolusyon numerado 10741.

Sinabi pa ni Perez an ‘‘permit to carry firearms’’ sa luwas kan residencia para sa mga sibilyan suspendido mientras na an law enforcers, kabale an kapupulisan, exempted alagad kaipuhan sinda naka-oniforme asin oras kan saindang duty.

Dinagdag pa kan PNP an naka-sibilyan na police personnel awtorisado na mag-transportar nin armas dawa dai naka-oniforme kun sinda nagcoconducir nin ‘‘lawful intelligence o counter-intelligence’’ sa sarong tiripon o actividades asin opisyal an saiyang misyon asin emerhencias.

Pigseguro kan jefe kan PPO na an mga nakadestinong mga pulis sa checkpoints, kumpleto nin oniforme.

An Commission on Election, 9th Infantry Division kan Philippine Army asin Philippine National Police opisyal nang pig-andaman an election period sa paagi kan ceremonial na pagbugtak kan Comelec checkpoint sa San Agustin, Pili, Camarines Sur.

Pinangenotan an piglansar na seremonya ninda regional director Rafael Olano kan Comelec Bicol, Maj General Alex DC. Luna, jefe kan 9th Infantry Division kan Philippine Army sa Bicol na may base sa Camp Elias Angeles, barangay San Jose, Pili, Camarines Sur, PNP Provincial Director Perez asin iba pang ahencia kan gobierno asin miembros kan media.

Si Atty. Maico Julia, election officer sa Ciudad nin Naga asin opisyal na parataram kan Comelec Camarines Sur nagpahayag an pagsinutil sa gun ban sarong election offense na puedeng malaom sa carcel nin sarong taon sundo sa anom na taon asin mayong probation.

Huhubaan na sinda nin diretso na maka-pagboto asin prohibido nang magpugol nin ano man na posisyon sa gobierno. (dpa)