top of page

Eleksyon Sa Kantong Putikon



Sa katuyuhan na pakusugon an kampanya kontra korapsyon sa gobyerno, pinag mawot kan mga “Philosophers” sa Kantong Putikon na gibohon pormal an organisasyon na ini. An Kantong Putikon namundag kan mga dekada 60 sa paagi kan mga taga radyo asin peryodista na nag titiripon tipon tanganing mag kape asin mag akab nin siopao sa kanto kan General Luna asin Kalye Evangelista sa centro kan Naga. An kanto iyo an New England Restaurant na pag rugaring kaidto kan Chinese Businessman si Mr. Cheng na an mga aking babae anas magayon mala ta saro sainda an naging Miss Chinatown duman sa Manila. Naging kultura sa Naga an mga gawi gawi sa Kantong Putikon ta digdi pinag oorolayan an dalagan pulitika asin an mga katuyawan sa gobyerno. Dara kan mga kontrobersyal na isyu sa gobyerno local, maging sa Naga asin sa ibang banwaan kabale na an kapitolyo, nagka oroyon an mga “Pilosopo Tacio” sa Kantong Putikon na gibohon kapaki pakinabang sa sosyedad an mga deklarasyon sa KP, kun kaya sinda nagka oroyon na magka igua nin formal na “Officers and Members” an Kantong Putikon. An mga pinag babana-bana na maralaban sa mga puesto iyo an mga minasunod: Sa pagka Presidente, makusogon an pangaran ninda Edwin Lara, Joe Grageda, asin Alex Parfan. Sa pagka Besi Presidente, matuninong na nag o-otwal an mga pangaran ninda Gabby Casimero asin Manny Gallardo. Sa pagka Secretary, makusog an pangaran ni Bong “ Hot Choco” Franco; Sa Treasurer, pinag tutubodan gusto ining tukobon ni Darius Bequillo; sa Auditor, makusog an pangaran ni Randy Sto. Domingo asin ni Bembot Perida. An pinag tutubudan na makusog sa pagka Sgt. At Arms mayong iba kundi si Sonny Sales asin si Manny Gallardo, duwa an Prince Charming, sinda Felix Carinan asin Jake Fortaleza. Ninhuli ta iguang female members na pirmeng yaon sa KP maski kan panahon pa ni Dialogo, puede man paki ulayan sinda na maging duwang“ muses” sinda Ms. Duwende Girl asin si Madam Millionaire na padangat si Gabby. Si Bert de los Martirez, iyo an pinag hahagad na maging Adviser kaibahan sinda, Louie Ortega, Daks Plopinio, asin Sm Ron Enon. Ang kampanya mapoon ano man na oras sagkod sa bulan nin Octobre na iyo an aldao nin Eleksyon, ini sarong secret ballotting. Dapat an gabos magka uyon sa slogan na “ Bawal Turuhok Legs, Bawal Borontolan, Poros Sana Direskusyonan”. Oras na magtukaw na an mga bagong opisyales kan Kantong Putikon, tolos nindang pag boborotohan an mga mayor na Agenda arog kan mga minasunod: 1. Magka igua nin estriktong debate asin diskusyon manonongod sa korapsyon kan mga opisyales sa gobyerno asin ini ibuyagyag sa paagi nin radyo asin peryodiko; 2. Magtao nin tukawan asin minutos para sa nag abot na personalidad na kunwari makiki kape asin makiki akab nin Donut lalo na kun siya saro sa pig sasahotan na kabale sa korapsyon; 3. Mag gibo nin criteria kan mga pulitiko asin opisyales kan gobyerno na dapat tuyawon, arog kan mga para sagin-sagin na konsehales nin Sanggunian na malilinig alagad kasabwat man sana kan sarong konsehal na iyo an omok-omok kan mga kontrata tanganing ipatrabaho sa bogus na kontratista; kabale sa dapat tuyawon iyo idtong abnormal an pagka kuripot nin sarong konsehal na solo-solo kun mag sab-sab nin pancit sa “Crown” asin dai man lang mangalukan sa mga nagkaka gurotom na “Philosophers” sa KP. Alagad importante na tawan pag omaw an mga opisyales asin pulitiko na nag-hapit sa KP, mag oorder nin kape asin donut para sa gabos ta an tawong arog kaini tatao mag heras kan saiyang hinakutan. Kulibat palan, an minamawot kan mga kandidato na iyo an maging Chairman kan Comelec para sa eleksyon kan mga bagong opisyales kan Kantong Putikon mayong iba kundi sinda Ernie Verdadero, Prof. Danny Gerona, asin si Jimmy Obiedo.

Comments


bottom of page