Emily Theatre ni Bichara

Kadakol na mga bikolano an dai nanggad makakalingaw sa Emily Theatre, sarong disenteng sinehan kan family ni Senior Victor Bichara, an patriarka kan mga sinehan sa Naga City asin Camarines Sur. An mayor na sinehan kan familya iyo an Bichara Theatre sarong landmark kan centro kan Naga, na yaon sa calle General Luna. An Emily Theatre guno man sa pangaran ni Senyora Emily Bichara ang ina ninda Jun Bichara na may dugong palestinyo alagad nagdakula sa Iriga City. Magayon an istorya ni Mr. Louie Ortega kan pagkamundag kan Emily Theatre na yaon sa extension kan Penafrania Avenue sa balyo kan Crown Hotel, harani sa Quince Martirez Plaza. Sa laog kan decada 60, mayo pa an Emily Theatre, asin an mahihiling sa lugar iyo ang mahiwas na Cuadra nin mga kabayo na pig uusar kan mga karetella na naglilibot sa mga barrio kan Naga asin iyo an mayor na lunadan ta dai pa uso an Trimobile. An Trimobile nagluwas mga ultimong parte kan decada 60, kun kaya durante kan peace time an pagtapos kan WW2, an lugar na kinamumugtakan ngonian kan Emily Theatre sarong Cuadra nin mga kabayo asin madoot abot sa gilid kan Naga River. An Familya Mendoza, daing relacion ki Tato Mendoza, nag desisyon na ipabakal an solar kun kay pinag ofreser ni Mr. Louie Ortega ang mahiwas na lote sa familyang Bichara sa paagi kan saiyang amigo na si Jun Bichara. Nabakal kan Bichara an solar sa kantidad na P160,000.00 alagad kan panahon na idto mayong kwarta ang Bichara tanganing ang dating Cuadra tugdukan kan Emily Theatre. Si Mr. Louie Ortega na kan panahon na idto sarong empleado kan GSIS, iyo an nagtaong idea ki Jun Bichara na mag avail nin loan sa GSIS sa kantidad na P500,000 tanganing gamiton sa pagpatugdok kan Emily Theatre Building. An requirement kaidto kan GSIS iyo na ang puedeng maka avail nin loan iyo an siisay man na empleado o nagtatrabaho sa gobyerno. An familya ni Don Victor asin Dona Emily Bichara nag iistar sa paagi nin magayon na mansion sa Concepcion Pequenia kung kaya konsiderado sindang residente kan Concepcion Pequena. Linakaw ni Mr. Loue Ortega ki Ricardo Regmalos, Barangay Captain kan Concepcion Pequenia na tawanan nin appointment bilang Barangay Treasurer si Donya Emily Bichara tangani sanang maka avail nin loan sa GSIS na iyo an pig gastos sa pagpatugdok kan Emily Theatre. Digdi ta maiisihan na si Donya Emily palan minsan pang naging opisyal kan Barangay asin an Emily Theatre dating Cuadra nin mga kabayo.