EMMANUEL

Aram kong nasa harani Ka sanang lugar

Dawa kaito pa man

Mayo lamang akong pakiaram sa Saimo

Ta an gubing mo simple, mayong adorno

Kun an roba Mo kuta nagkikirintaban

Seguro madali ko kuta Ikang namotan

Kun an tataramon Mo kuta sa tentasyon

Seguro madali akong uminuyon

An mata ko kaya madaling maribaraw

Sa kintab kan pirak saka bulawan

An puso ko kaya matagas

Siring sa sarong batbat

Kan ipinako Ka ninda sa krus

Saka ko namate an langitnon Mong pagkamoot

Saka ko nahiling an mga lugad Mo

Mas hararom sa mga bakros ko

Saka ko namate an pagka-Diosnon Mo

Asin an abang pagkatawo ko

Ta nagpagadan Ka 

Tangani sanang mabuhay ako!

Ako na nagtakwil sa Saimo!

Ako na nagnegar sa Saimo!

Ngonian na nagbangon ka lulubngan

Susunodan ko na an Saimong dalan!

Kun mayo Ka, mahal na Kagurangnan

Haen, haen kaya ako ngonian?