Empleados, opisyales kan LGU SB nag-pepenetencia na daing sueldo

Dai pa na-semana santa alagad maabot sa 60 mga empleados asin opisyales kan Sangguniang Bayan kan Pili, Camarines Sur magpapadagos sa pag-penetencia sagcod na magutom nin huli ta aabuton na nin sarong bulan dai pa nagsusueldo.


An naging ugat kaini iyo an suspension kan Capitolyo Provincial ki Alcalde Tomas Bongalonta Jr., dawa nakabuelta na sa puesto kan Marso 8 matapos makarecibe nin ‘‘stay order’’ hali sa Department of Interior and Local Government, sabi ni Consejal Francis Belen.


Alagad segun sa consejal an problema iyo an pagpadagos sa puesto ni Bise Alcalde Marivic Solano na nagsasayumang magbutas kan posisyon bilang acting mayor.


Nakaisip nin solusyon an Sangguniang Bayan nagpasar nin resolusyon na nagdedesignar ki Consejal Roger Regundola bilang acting presiding officer asin awtorisado na magpirma sa transaksyon kan tsike sa saindang depository bank.


Katuyohan kaini nganing makasueldo na an apektadong mga empleados, casual asin job order maging opisyales kan SB alagad an pirma ni Regundola dai man pigreconesir kan bangko na hinahagadan nin documento hale sa DILG na siya an karibay ni Solano bilang acting vice mayor.


Nag-untol an transaksyon sa bangko nganing maka-withdraw nin cash na pansueldo.


Nangapudan si Belen na siya naghelig na ngani bilang acting vice mayor bilang pagrespeto matapos marecibe ni Bongalonta an ‘‘stay order’’ hale sa DILG tolos siyang nagbuelta sa puestong consejal.


Nganing matapos na an problema asin dai magkagurotom an pobreng empleados dapat magbalik na sa tukawan bilang bise alcalde si Solano, sabi pa.


Sa paliwanag ni Solano na saiya sanang sinusunod an legal advice kan abogado kun tano ta dai dapat magbutas sa puesto.


Sinabi pa na kun igwa nang orden hali sa DILG na magbalik na siya sa tukawan kan bise alcalde iyo an dapat masunod.


Si Bongalonta na isyuhan nin duwang bulan na preventive suspension ni Gobernador Migz Villafuerte puon na marecibe niya kan Febrero 15 asin dapat magpaso sa Abril 15 na iyo man ini an mawot masunod kan acting vice mayor. (dpa)