Empleados sa Capitolio kan Camarines Sur, dejado sa bunos

An Capitolyo Provincial kan Camarines Sur na sarong 1st class province sa Bicol nagtagama nin Christmas bunos sa saindang mga empleados nin maabot sa diez mil pesos sa inaprubaran na alokasyon kan Sangguniang Panlalawigan na Php90 milyon.

Si Vocal Romulo Hernandez kan segundo distrito asin Vice Chairman kan Appropriation Committee kan SP nagpahayag an bunos bako lang para sa regular envez kabale an mga casual asin job order.

Mas halangkaw nin cinco mil pesos kumpara kan nakaaging taon mantang nagdedepende sinda sa fondo kan provincia.

An ibang mga empleados na habo nang magpasambit kan saindang pangaran nagsabi na dejado sinda sa ibang mga LGUs sa Camarines Sur na kayang makataong Php25 mil pesos sagcod sa Php50 mil apesar na bilyonaryo an Capitolio.

An diez mil pesos dai kabale sa mandatory 13th month pay pa sa mga regular asin casual na empleados.

Sa 2021 annual budget kan LGU Camarines Sur maabot sa Php4.5 bilyon alagad sa paliwanag kan vocal dakula an mga gastos sa mga proyekto kan provincia nakadagdag pa an alokasyon sa Covid-19 response.

Nangyayari na dakulang Christmas bunos kan empleados sa mga municipalidades asin ciudades sa Camarines Sur mantang an ibang fondo dai nagagamit sa ibang mga proyekto asin nagiging savings nganing makadugang sa fondo sa bunos, sabi pa.

Sa sunod na taon 2022 an gobierno provincial igwa naman nin Php5.5 bilyon mantang an nakadugang an dakulang fondo huli kan Mandanas ruling.

Sa Mandanas ruling kan Corte Suprema naglangkaw nin 39 por ciento an marerecibing Internal Revenue Allotment mientras magkakaigwa nang kahirasan sa buwis an LGUs hale sa national taxes bako lang sa Bureau of Internal Revenue. (dpa)