ENERO 1, 2022 HASTA DECIEMBRE 31, 2022: P96-M ilegal na droga nakumfiscar, 9 gadan
An giyera laban sa ilegal na droga saro sa may halangkaw na acomplisimiento kan Bicol PNP sa peryodo poon kan Enero 1, 2022 hasta Deciembre 31, 2022 na igwang cantidad na nakumfiscar Php96,846,755.69 sa 963 na drug operations sa anom na provincia asin siyam an nagadan.
Sa mga operasyon maabot sa 1,361 caso an sinangat sa corte. Nag resulta sa pagkakakumfiscar kan 1,359.79 gramos nin marijuana asin 14,207.34 na gramos kan shabu na igwang cantidad nin Php96-milyon.
An enot na anom na bulan kan 2022 yaon pa sa laog kan dating administrasyon Presidente Rodrigo Duterte na saro sa saiyang pigtawan nin prioridad an giyera sa droga alagad nagpadagos an saindang higot na kampanya sagcod na nagtukaw an bagong administrasyon ni Presidente Marcos kaya ngani multi-million pesos na ilegal na droga an saindang nakumfiscar.
An Bicol PNP pinamamayohan ni BGen. Rudolph Dimas, ipapadagos ninda an mga programa laban sa kriminalidad lalo na sa droga.
An mga planadong police operations sa saindang na-implementar pagwarak nin kapupulisan para sa ‘‘police visibility’’, mobile patrol asin traffic management, kampanya kontra droga, halangkaw na acomplisimiento sa wanted persons, insurhencia, ilegal na pagsisira, illegal logging asin paglapag sa mga criminal gangs.
An sinambit na mga programa saindang narealisar kaya ngani bako lang sa ilegal na droga an natawan prioridad maging iba pang mga kriminalidad, sabi pa kan Bicol PNP.
Kabali digdi an report hali sa Naga City Police Office saro man sa may halangkaw na acomplisimiento sa ilegal na droga na nag-aabot sa cantidad Php21 milyon asin 118 an mga nagkadarakop mantang suhay man an cantidad Php50 milyon na acomplisimiento kan PDEA Camarines Sur.
Sa kampanya laban sa insurhencia igwang 142 na miembros kan rebeldeng NPA an saindang nadakop asin 259 nagsuko mantang 33 na mga rebelde an nagadan sa encuentro.
An liderato ni Dimas na implementar an saindang mga estratihiya sa tabang kan KASIMBAYANAN stakeholders nganing maseguro an matuninong na kumunidad.
PAGLINIG VS ILEGAL NA DROGA. Liwat pinonan ngunian na taon sa liderato ni PBGEN Rudolph Dimas an paglinig sa laog kan organisasyon kan PNP Kasurog Bicol sa paagi kan random drug testing sa 280 personajes kan opisina rehiyonal kan PNP Bicol. (PNP Kasurog Bicol)
RANDOM DRUG TESTING
Ngunian na taon tolos pinonan kan PNP Kasurog Bicol an random drug testing kan Enero 6 sa 280 personajes kan Police Regional Office 5 parte kan saindang kampanya na dapat sa laog kan saindang organisasyon mayong envuelto sa ilegal na droga.
An drug testing kan Bicol PNP sa paagi kan Regional Division and PNP-Crime Laboratory. An arin man na mag-positivo nakatalaan isunad sa summary dismissal proceedings kan Regional Internal Affairs Service.
An lakdang na ini sa katuyohan kan liderato ni PBGEN Rudolph Dimas nganing malinigan an saindang organisasyon sa sahot sa ilegal na droga asin maseguro na saro nang ‘‘drug free community’’ an Camp Simeon Ola. (dpa)