Engrandeng 2nd Alumni Homecoming kan Milaor University

Kan mag-eskwela ako sa Naga kan Hunyo 1962 pighahapot ako kan mga tao kun ako “Parochialista”. Sabi ko bako ta ako nagtapos sa Milaor University.

Aktwalmente an Milaor Central School arog kan Camarines Sur National High School (Camhay) binukasan kan mga Amerikanong Thomasites kan 1902.

Kan 2002 nag-celebrar kami kan ika-100 na anibersaryo kan eskwelahan sa paagui kan engrandeng homecoming na pigdalaw nin mga alumni asin alumnae hali sa manlaen na parte kan kinaban. Ako an presidente kaidto na napili pero mayong bise. Katabang ko si Rudy Alivarvar asin Mrs. Bartolome kan MCS faculty.

Salamat sa MCS batch 1976 ta ngonyan na taon sa maabot na Mayo 2-3 sinda an duenyo o sponsor kan 2nd MCS Homecoming ngonyan na taon.

An bagong grupo pinapamayuhan ni Lucena “Che” Nullan Bermeo asin ni Dr Eliezar Babilonia, Nelly Totaήes asin mga aktibong batchmates, kadaklan babae.

Sarong taon an preparasyon poon pa kan 2023 na nagmimiting bulan-bulan sa Milaor Cultural Center pati mga imbitadong alumni hale sa ibang batches. Suportado pati sindang marhay kan bagong principal na si Mr Raul San Vicente na taga-Gainza.

An tuyo kan okasyon iyo an magtalanhok sa lambang alumnus o alumna kan eskwelahan an orgolyo na sinda naguin parte kan 122 anyos nang Alma Mater.

Haros kabanga kan kadagaan kan barangay Amparado sakop kan eskwelahan sa pangpang kan Bicol River na mina-agui sa Isla Matungaw. An MCS naka-producer bako lang nin dakul na professionals asin mayayaman na negosyante kundi mga lider nin komunidad, ekspertong paratukdo, mga iginagalang na personalidad sa Bikol asin sa nasyon.

Igwa ngani nin napiling Most Outstanding Teacher of the Philippines asin registrar nin mga dakulang eskwelahan asin Universidad sa Metro Manila, mga naguin manager nin banko asin executives sa darakulang kompanya. Igwa man nin mga politiko asin servidor kan gobyerno.

Igwa man nin mga miyembros kan media na pigtutubod kan mga paraantabay sa man iba-ibang banwaan asin provincia sa rehiyon.

Kan naka-aguing mga bulan may nag-aratinder kan General Membership miting na hale sa abroad na maaratendir kan okasyon sa Mayo. Excited na pati.

Sa higos kan mga organizers nagrilibot sa manlaen-laen na barangay, kinaulay an mga kapitanes, nagtaltag nin mga tarpaulin na nag-aanunciar kan okasyon, nag-aanunciar sa radyo asin peryodiko asin sa paagui kan pig-aapod na word of mouth o an pig-aapod ngonyan na Marites. Piglalaoman na dae mababa sa 3mil na tao an maarabot sa dakulang okasyon na guiguibuhon mismo sa mahiwason na school ground.

Kan enot na homecoming an mayor na katuyuhan iyo an icelebrar an ika-100 na anibersaryo kan eskwelahan, mailaog sa kukute kan mga alumni an orgolyo na sinda naguin parte kan eskwelahan, magkahirilingan si mga magkakaklase na dae nagkanumpungan sa halawig na panahon. Kaya mayo nin kontribusyon na hinagad sa mga miyembros, mayong physical na infrastructure na itinugdok ta an tuyo sana mag-orogma, magtiripon asin maghirilingan.

Kanya-kanyang batch, kanya-kanyang pagkakan asin tiripon man sinda sa laog nin sarong classroom. Kuno-kuno an lambing kuarto na an iba may mga litson asin nagpa-cater nin de garbong pagkakan.

Ngonyan an organizers katabang si principal mapatugdok daa nin sarong covered court na kakanan o istambayan kan mga eskwela na dae na mapuruli sa hararayong residencia tanganing magpa-ngudto asin mag-snack, magkarawat-kawat nin chess kun recess o vacant period.

May mga gates, mga tukawan asin iba pang kagamitan na pig-donar sa eskwelahan.

An okasyon sa Mayo pakatapos kan pyista kan banwaan tatampukan nin misa sa duwang aldaw na magkasunod, medical mission sa primerong aldaw na paparticiparan kan alumni na naguin doktor, nars asin health workers. May parada sa palibot kan banwaan apuera sana sa national highway, siyempre may barayle, karawat,may mga mapantumina asin iba pa.

Mat suhestyon ngani na magka-igwa nin arts exhibit an mga MCS gradwayt na pintor kulapol, magdagdag nin project arog kan scholarship asin magka-igwa nin guest speaker na bakong politiko.

An sekreto kan bonga asin maogmang okasyon 122 anyos na an nakaka-agui iyo ta hinali an politika kan enot na homecoming, ngonyan iyo man.

May mga awardees na outstanding graduates asin mga dating paratukdo na buruhay pa sagkod ngonyan.

Kan panahon daa an maka-abot lang nin grade 7 pwde nang magtukdo sa eskwelahan. May mga nagtapos kaidtong grade 7 na nagturokdo sa Naga sagkod Rinconada, sa banwaan nin Buhi, Libmanan asin Calabanga.

An mga senior citizen na nagtarapos kan dekada 50 sagkod dekada 70 maparada man maski naka-paradyak, naka-uniporme gabos. May banda, orchestra asin ma-imbitar nin mga tao na maiba sainda sa parada.

An paglaon iyo na taun-taon magkaka-igwa nin homecoming arog kan Ateneo asin Santa Isabel na dadalahon nin dakul na tao. Puedeng magka-igwa nin regular na eleksyon kan mga opisyales taon-taon.