top of page

Enot na Filmfest nin pelikulang Partido ginibo

Ni Sonny Malate


Goa, Camarines Sur --- Ginibo an primerong patiribayan sa paggibo nin  Pelikulang Partido kan nakaagin semana sa Partido State University (ParSU) sa banwaan na ini. An filmfest na inapod  «Talingkasine Festival 2023” pigpadrinohan kan Talingkas Film Society na nasa irarom kan Arts and Culture Department sa pamamayo ni  John Vincent Baylon.


An  kabaleng apat na pelikula nagsasalming kan  cultura sa Partido Area asin  pighaman sa man-iba-ibang genre arog kan suspense, horror, fantasy asin comedy. Ini pigshooting  sa nagkakapirang banwaan sa ika-apat na distrito kan probinsiya na may magagayon na kadlagan, salog asin mga ancestral house.


Kabarale sa apat na pelikula iyo an Alo kan Digital Eye Production; Balo’, VNC Production; Timon, Lamosa Production  asin Kompleaño, Ungman Production.


Nakua an Best Picture kan Balo’; sarong pelikula dapit sa pagkawara kan sarong lalaki sa kadlagan na pigtutubodan na an kaggibo iyo an misteryoso asin marawraw na tawong lipod sa kadlagan.


Pelikulang “Balo’” best picture sa primerong Pelikulang Partido sa Partido State University, Goa, Camarines Sur. (Photo: Talingkas Film Society)



An iba pang mayor na mga ganador iyo sinda Ray Fernandez Japa - Best Director; - Best Actor - Angelo Araojo; Best Supporting Actor - Jameson Condat;  Best Actress - Crissel Tribiana: Best Supporting Actress - Apple Mae Castor.


Dagdag na mga nanggana  iyo an Best Screenplay-Edralyn Rapi; Best Film Editing - Marlon Pascua; Best Musical Scoring - Marlon Pascua; asin Best Cinematography - Cris de Jesus asin Maria Isabel Enciso.


Pambihira na an mga pelikulang kabale sa filmfest nahaman haros sa laog nin duwang semana sana  alagad ini de calidad asin kabaing sa mga pelikulang gibo kan mga professional na filmmaker. 


Manonotaran man na an mga nagbale sa competition nakaguno nin panggastos sa paggibo kan pelikula  ninda  sa pagsolicit sa mga may mahuyong boot sa comunidad. 


An apat na pelikula pigpasale sa laog nin duwang semana sa ParSU  Audio Visual Room sa minimal na entrance fee. An gross ticket sales babangaon kan film production asin Talingkas Film Society.


Durante sa awards night sa ParSU Gymnasium, nagpahayag nin dakulang kaogmahan si Omen Cano, Adviser kan Talingkas Film Society, sa  esfuerzos asin pambihirang talento kan mga estudyantes sa linya nin paggibo nin pelikula asin acting.


Sa masunod na taon an competition iluluwas na sa  campus kan ParSU asin magigin bukas sa ibang film makers sa Partido Area. Katuyohan kaini iyo na orug pang mapahiwas an Pelikulang Partido asin maparambong an talento kan mga taga  digdi. Papahiwason man an tema hale sa cultura pasiring sa mga isyu social.


Huli sa pagreconusir asin iduduhol na asistencia kan Film Development Academy of the Philippines (FADP), an mga miembros kan Talingkas Film Society nakatalaan na magbale sa pangnacion na mga filmfest sa mga masunod na taon.


Mientrastanto, sa paglaog ni Dr  Arnel B. Zarcedo bilang bagong ParSU President, piglalaoman na orug pang marambong an mga pangcultura asin arteng programa kan universidad. 


bottom of page