ENOT SA CIUDAD NIN NAGA: LTO-LGU interconnectivity pigpapaotob na kan PSO

Pig-iimplementar na sa Ciudad nin Naga na pinakaenot digdi sa Bicol an LTO-LGU Interconnectivity (LLI) na arin man na madadakop na nagbabalga sa ley trafico maging ordinansa sa trafico kan LGU mabayad nin multa sa paagi nin online.

Ini an mga pahayag sa Bicol Mail ni PSO Executive Director Renne Gumba kasunod kan ginibong Memorandum of Agreement (MOA) signing kan Mayo 2024 na presente sa sinda Atty. Noreen San Luis-Lutey kan opisina sentral kan LTO, ofisyales lokal kan City Hall asin mga opisyales kan LTO-District Office saka opisina rehiyonal.

An implementasyon kan LLI nagsikad ngunian na Hulyo 2024 matapos kan mga ginibong preparasyon asin information drive kan PSO, sabi ni Gumba.

Si Lutey, iyo an utak kan LLI o single ticketing system na pigponan ipasunod sa mga muncipalidades asin ciudad sa Metro Manila Development Authority (MMDA) kan Agosto 15, 2023 asin pinakaenot sa Naga digdi sa Kabikolan asin nakatalaan iimplementar sa iba pang mga ciudad.

Sinabi pa an proyecto dai na kukumpfiscaron an lisensya sa pagmanijo kan traffic violators asin si may ten year validity kan driver’s license puedeng bawasan depende sa ley trafico.

Alagad envez kan pagkumfiscar sa lisensya iisyuhan nalang nin ticket kan traffic enforcer na dapat magbayad na kan multa sa paagi nin bangko o sa online. Afuera pa kaini, direkta nang ililista sa opisina kan LTO para sa provisional alarm.

Sinabi pa ni Gumba posibleng magka-problema si sutil sa ley trafico sa pag-renew kan saindang lisensya sa LTO.

Katuyohan kan ahencia nganing malikayan an isyu sa kurapsyon asin dapat magsunod sa regulasyones sa trafico nganing mayong problema, sabi pa ni Gumba.

Dinagdag pa ni Gumba kabale sa saindang programa iyo an One-time-bigtime na kabale sinda sa grupo kan NCPO, ENRO Office kan City Hall asin smoke belching laban sa mga nagbubugang maitum na aso.

Pig-tatabangan ninda an DILG nganing iimplementar na kan opisyales de Barangay an road clearing operations.

Wala-too an mga hinahagop nin wheelclamp kan PSO sa mga vehiculo na naggagaraje sa ‘’No Parking Area’’ sa centro kan Ciudad nin Naga. (DPA/Bicol Mail)