EPEKTO KAN TAG-INIT: P177.2-M danyos sa agricultura sa Bicol

Bako lang sa bagyo apektado an sektor nin paraoma alagad magin bulan nin tag-init nagsakat na sa P177.2 milyon an danyos sa agricultura sa rehiyon Bicol.

Sa pinakahuring listahan kan Department of Agriculture (DA) Bicol, sinabi ni Lovella Guarin, opisyal na parataram kan ahencia an may pinakalangkaw na danyos huli kan tag-init iyo an mga tinanum na gulayan na nag-abot na sa P161.3 na nadagdagan pa kan mag-alburoto an Volcan Mayon sa Albay.

An mga apektado kinababalehan kan omahan, maisan, asin gulayan sa anom na provincia kan rehiyon.

Kun ikukumpara sa rehistradong 500,000 na paraoma sa rehiyon maabot sana sa 800 an apektado base sa mga listahan hale sa mga Municipal Agriculture Office (MAO) alagad posibleng maglangkaw pa an danyos depende sa mga pinapaabot na report.

Sinabi pa ni Guarin, igua nang 70 hektarya na maisan an apekado mantang sa omahan nagsakat na sa 155 hektarya an 108 digdi sa Albay asin 46 hektarya sa Camarines Sur.

An lakdang kan ahencia iyo an pagtaong ayuda siring kan banhi nganing makabawi an paraoma.

An National Irrigation Administration sa rehiyon padagos man kan saindang patubig sa omahan orog na si kulang an tubig sa mga omahan.

SA SUPLAY NIN BAGAS

Sa tahaw kan halangkaw si produksyon nin paroy sa rehiyon sa ngunian abunda an suplay nin bagas sa mga mercado maging sa National Food Authority mantang nagpapadagos an pagpabakal kan ‘‘Benteng Bigas, Meron Na’’.

Naglangkaw nin 2.38 por ciento si ani nin paroy o produksyon kan nagtalikod na taon 2025 kun ikukumpara kan 2024.

Sa report kan DA Bicol iguang labi sa 1.23 metrico tonelada na mas halangkaw si produksyon kumpara kan 2024 mantang mayo nin dakulang calamidad sa rehiyon.

Bulan nin aranihan ngunian na Mayo 2026 alagad nabuhay naman an mga opurtunistang kumprador nganing ibagsak naman an presyo kan paroy cada kilo hale sa dating P23 sa ngunian ginibo nang P16. (BM)