EPIRA dapat nang retokihon - LRay

Pigtutulod ni Diputado LRay Villafuerte kan segundo distrito kan Camarines Sur asin iba pang lehislador sa 19th Congress nganing magbarato an tarifa kan kuryente kaipuhan nang retokihon an Electric Power Industry Reform Act (EPIRA).

Sinabi sa FB post kan diputado kinakaipuhan nang bagohon an probisyones kan ley o dagos nang ibasura an tinataong exclusibong deretso kan manga distribution utilities mag-operate sa saindang sakop na franchise area.

An propuestong ini sa tahaw kan pagparalangkaw kan tarifa sa kuryente haros kan gabos na cooperativa nin electricidad sa nasyon.

Alagad nagtutubod an Camarines Sur III electric Cooperative (Casureco II) Inc. sa Rinconada area an planong ini kan diputado sa segundo distrito iyo an saindang propuestong House Bill No. 10 1084 sa hinahagad na franquicia kan Bicol Light and Power Corporation sa sakop na mga banwaan kan Rinconada area na kinababalihan kan mga banwaan kan Baao, Bula, Buhi, Balatan, Nabua, Bato asin Ciudad nin Iriga.

An isyung ini kaparejo man an saindang panindugan ni Presidente Ferndinad Marcos Jr. na dapat matawan nin baratong tarifa nin kuryente an Filipino.

Dinagdag pa ni Villafuerte igwa nang cooperativa nin electricidad sa Iloilo na pigsa-pribado na.

Sinabi man ni Casureco III Director Wilbur Almoneda an pigtutulod na bill dai mangyayari mantang malinaw na mabalga sa probisyon kan Section 27 kan Acta Republica 9136 o mas midbid sa EPIRA mandating that all existing franchises shall be allowed to full term. An cooperativa igwa pang pitong taon antes magpaso an saindang franquicia.

An sinambit na bill ni Villafuerte ika-apat nang veces pigsangat sa congreso alagad liwat naman na binuhay ngunian na 19th Congress katuwang na an duwa pang congresista sa Camarines Sur.

An HB NO. 1084 An act granting the Bicol Light and Power Corporation a franchise to construct, install, establish, operate, own, manager and maintain a power distribution system for the conveyance of electric power to the end users in the towns of Baao, Balatan, Bato, Buhi, Bula, Nabua, asin Ciudad nin Iriga, province of Camarines Sur, and for other purposes.

An bill kun maging ley segun sa diputado kan segundo distrito magkakaigwa nin kumpetensya sa Casureco III na maresulta sa pagbaba kan tarifa.

Alagad an Casureco III nagtutubod na bakong kumpetensya an katuyohan envez take over.

Nagtutubod pa an director na dai makaka-opresir nin mas hababang tarifa an Bicol Light huli kan dakulang gagastoson ninda sa electricity asin energy cost.

Pigdadahilan pa kan Casureco III na an pagparalangkaw tarifa huli kan halangkaw na presyo na pinapabakal sa sainda kan mga power supplier asin epekto pa kan pagparalanglaw kan produkto nin petrolyo.