Ervin Borja The Best Commentator



Magayon pag romdoman an mga bulawan na pangaran sa linya nin komentaryo sa radio. Naoogma ako na ngonian na henerasyon sa radio igua nin sarong Irvin Borja na nag sisikat sa linya nin commentary, alas 6:45 -7:00 nin aga sa programming “Ano Daw Banwaan” (OK FM, an Radyong Balanciado). Si Ervin Borja, dai nanggad mina-atubang sa mikropono na dai pinag-aadalan an bubutasan na mga tataramon, tanganing makatao nin adal asin giya sa mga paradangog. Nagigiromdoman ko an mga komentarista kan panahon, na magayon dangogon sa madunong nindang pag tratar sa tema. An mga pig dadagog kaidto iyo sinda, Leon Palmiano Sr., Eddie Alanis, Aling Sonia, Edsel Salvo, Ernie Verdadero, Henry Briguera, David Dollano, Eddie Imperial, asin Celso Baguio. Sigun ki Ervin Borja, an pagiging komentarista, dapat igua nin pusog na paninindugan ta dai gabos niyang amigo o sadiring tawo mina pabor sa saiyang pag tubod. Sa 41 taon ko sa radyo (nagpoon ako sa DZHN 1981, sa deck roof kan Supermarket), ngonian na naman ako naka sumpong nin komentarista na may marhay na punto de vista, mayong kinikilingan, iyan sa persona ni Ervin Borja. Inot kong nabisto si Ervin Borja kan kami magka klase sa mga Accounting Subjects sa UNC kan dekada 80. Si Ervin iyo an samuyang Presidente sa klase asin sa Campus Politics. Sa kursong Accounting, igua kan inaapod na Departmental Examination kahawig kan “mini” CPA Board Exam.


Saro si Erwin Borja sa pirming yaon sa Top 10. Saro sa abilidad ni Ervin sa loag kan UNC Commerce Department, iyo an pagiging bright sa subject sa Economics na deficil maintindihan dara kan mga graphics asin mga pasikot sikot na dalagan nin negocio sa kinaban. Sa mga kababaihan, si Ervin sarong Campus Idol, garong artista, ta ini sputing malinig magdarang bado (sugad daa sa Ama Tyog Pector), ala Clark Gable an begote, guapo asin maboot. Saro na dai malingawan na controversy sa Campus, iyo an sarong malimpoy na hapon sa sarong bench harani sa Alba Hall, pig aaragapan an sarong nag hehesteria, nagpapara hibe na female student napapa libotan nin mga amiga kaklase ta pig papa parong nin oil of winter green tanganing dai madismayo. Nag abot an Ervin ta gusto mag usyuso, alagad gabos na nakapalibot duman matarom an hiling na garong nambabasul, kaya palan ta an pig aaragapan, GF ni Ervin na nadidismayo sa kasisilos ta an Ervin napapabareta na may pig papasyaran sa Arts and Sciences na mestisa . Nag suwayan an dalan mi ni Ervin kan kami nag graduar asin ako nag konsentrar sa radyo asin mantang si Ervin nag laog sa US Navy. Maski ako saro man na taga radyo, dai nanggad nakaka lingaw na mag dangog tuyong amay sa komentaryo ni Sir Ervin Borja ta ako nakakanood pa man giraray. Makonsuelo pag isipon na kami ni kumpadre asin Pinsan Danny de Leon parehong “confused” kun paano kami naging mag pinsan, kawasa dai nag walat nin kapaliwanagan an samuyang mga ninuno manonongod sa samuyang family tree. Haloy antes pa an pandemya, naging ugali mi ni Danny de Leon an mag kape sa saiyang home-garden na mapresko ta palibot nin masitera, minsan yaon kami sa mga kapehan sa Centro, tunay na maogma an pagkahapon kaidtong dai pa uso an pandemya. Sa pagigi ming mag pinsan, aki pa daa si Danny pig istorya na kan mga gurang na kaming mga De Los Martirez sa Sta. Cruz pinsan kan mga De Leon na yaon sa Calaluag.


Inot kong naaraman na mag pinsan an duwang apelyido kan ako yaon sa Grade 2 sa Sta. Cruz Elementary School. Dai kaidto nag laog sa klase an advisere na si Maam Milagros Peralta kaya nag substitute si Maam Lilia De Leon Moreno na taga Calauag asin tugang kan Ama ni Danny De Leon. Sa attendance, pig taram ni Maam Lilia Moreno (Mother of Engr. Moreno of CEO) na tiya ko siya ta pinsan niya si Pablo (My father). Para sakuya orgullo ko na maging pinsan an kagalang galang na tawo arog ni Danny de Leon. Nag hanga ako sa bago niyang hitsura, balbas sarado na ngonian kahawig ni James Coburon. Saro sa dai ko malingawan sa pinsan ko, iyo an pagigi niyang adviser asin collaborator sa sakuyang mga assignment reporting durante kan ako nag adal nin MBA sa UNC, madunong si Danny sa Enterpreneurship Management ta ini nag adal sa Manila asin Abroad.