Espiritu kan Pasko

Tigsik ko an Pasko sa kinaban

Pagkamundag kan satong Kaglalang

Maogma an kadaklan, nagrorokyaw

May pighahalat, may pig-aantabayanan!

Tigsik ko an Pasko may kahaditan

Mayong katuninongan na nagrereynar

Sa mga naciones, giyera nagdadanay

Kaakian mayong pag-aram, nadadamay!

An Paskong sakong nagimatan tigsik ko man

Magkataraid mayong pakiaram

Mayong pakimano sa kapalibotan

Dae nadadangog an mga inagrangay!

Mayo nin pagpapatinaotaohan

Mayong pagpapatinawadtawadan

Nabubuhay para sa sadiri lang

Makusog an boot, alagad maluya man!

Tigsik ko an Paskong sakong pighihidaw

Iguang pagkamoot, may katuninongan

May paglaom, iguang ogmang tunay

Daradara kan satuyang Kaglalang!

Matagas tang puso satuyang bukasan

Isabuhay an mensahe kan satong Kaglalang

Espiritu kan Pasko satong makakamtan

Sa aroaldaw tang buhay sa kinaban!