ESPIRITU KAN PASKO
- Bicolmail Web Admin
- Dec 27, 2025
- 1 min read
Tigsik ko an Pasko sa kinaban
Pagkamundag kan satong Kaglalang
Maogma an kadaklan, nagrurukyaw
May pighahalat, may pig-aabangan!
Tigsik ko an Pasko, may kahaditan
Mayong katuninongan na nagrereynar
Sa mga naciones giyera nagdadanay
Ano an dae nababangang bagay?
An Paskong sakong nagimatan tigsik ko man
Magkataraid mayong pakiaram
Mayong pakimano sa kapalibotan
Dae nadadangog an mga inagrangay!
Mayong pagpapatinawadtawadan
Mayo nin pagpapatinaotaohan
Nabubuhay para sa sadiri lamang
Makusog an boot pero maluya man!
Tigsik ko an Paskong sakong pighihidaw
Iguang pagkamoot, may katuninongan
May paglaom, iguang ogmang tunay
May pagkasararo huli sa Kaglalang!
Matagas na puso satuyang bukasan
Isabuhay an Mensahe kan Kagurangnan
Espiritu kan Pasko satong makakamtan
Sa aroaldaw niatong pagkabuhay sa kinaban!
Comments