Estudiante dakula an pakinabang sa pagigin sarong vlogger

Ni Sonny Malate

Dakula an pakinabang  sa paggigin sarong vlogger ni Kanor's V o Aaron D. Azuela an completong pangaran,  21 años, 4th year sa cursong BS in Electrical Engineering sa Partido State University (ParSU) main campus, Goa, Camarines Sur. 

Si Aaron  residente kan Barangay Boclod, San Jose Partido. Matua siya sa anom na magturugang. An saiyang ama sarong trabahador sa oma mantang an  ina nagluluto asin naglalako  kan  managom  na Bicolnon na panirang tinuktok asin manlaenlaen na lutong bahay na kakanon.

Dawa na ngani kabale sa 4Ps, an pamilya Azuela nadedeficilan sa saindang aroaldaw na pagbuhay. An saindang harong na gibo sa local na materiales nasa gilid kan kaomahan, mayong suplay nin kuryente asin linya nin tubig.

Segun sa vlogger, 13 años pa sana  nag-iiba na siya sa ama sa pakikialdawan sa oma. Huli kaini, nakanood siyang maglaplap asin magtaltag nin dalugi, magtarok, maghilamon, tagibho, mag-asyab asin mag-arastre.

Orgulyong pigsabi ni Aaron na tatao siyang maggamit nin hand tractor, mag-arado asin pakayat. Tatao man siyang maggamit kan palay tresher kan panahon na dae pa uso an rice harvester, midbid sa apod na halimaw.

Dawa na ngani deficil an pagbuhay, siya nagkaigua man nin sadiring cell phone. Alagad bakong arog sa iba na gamit ini  sa ML, scatter o pamatangaan na pakikiboahan sa chat sa jowa, nakahiligan niya an magin content creator o vlogger na ikinangalas asin ogma kan mga nakakabisto sa saiya.

Magpoon kan Enero ngonian na taon, pigseryoso ni Aaron an paggigin vlogger,  Sa presente, igua nang labing 60 mil siyang followers, gikan digdi sa Pilipinas asin ibang nacion. Tanganing mas dakol an makasabot kan saiyang content, lengguaheng Filipino an gamit niya.

Para sa branding asin identity sa social media, pinili ni Aaron na itampok  an sadiri niyang tunay na pagkatawo -  sarong huben na estudiante sa probinsya,  gikan sa tikapong pamilya na nagdidiskarte, nakikilaban sa buhay para sa maliwanag na futuro.

Sa paagi kan saiyang vlog, nag-online  selling an pamilya Azuela kan lutong tinuktok asin ibang kakanon. Si Aaron naglalako asin nagdedeliver kan mga paorde sa San Jose asin pagtaraid na banwa.

Sa tahaw kan paglapigot ni Aaron, piglalaog niya sa saiyang mga content an saiyang mensahe nin inspirasyon - na magpadagos sa pakikilaban sa agyat kan kadeficilan sa aroaldaw na pagbuhay. Na iguang maliwanag na futuro basta maghinigos, dae mawaran nin paglaom asin nungkang malingaw sa Kaglalang.

Sa ngonian, namamate ni Aaron na an paggigin vlogger bakong madali para sa saiya. Android na cellphone sana an gamit niya, inaabot an pag-edit hasta pitong oras  pamatangaan sa harong kan lola niya sa  barangay Santa Cruz, labing sarong kilometro an distancia sa barangay ninda 

Naoogma lang an huben na vlogger na nagkusog an benta kan paninda ninda.  May  naguguno naman siyang minimal na monetization bilang vlogger. Apwera kaini, may dikit naman siyang narerecebing pampalubag loob sa mga endorsement na ginigibo niya.

Dagdag pa kaini, may  tabang material asin financial siyang nakokoa gikan sa nagkakapirang followers. Dawa na ngani bakong motibasyon ki Aaron an material asin financial na aspeto sa pagvlog, dakula an saiyang pasasalamat sa mga biyaya na narerecebi ninda.

Apwera kaini, maogma sa boot ni Aaron na nabibisto na padikitdikit kan ibang tawo an arog niyang promdi o tubong probinsya, may simpleng tindog  alagad madiskarte, matinabang sa magurang asin role model sa mga hubenes.

Sa gabos kaini, urog na naoogma si Aaron na sa paggigin sarong vlogger nagkatotoo an gusto niyang iheras na mensahe sa social media - na may paglaom, magayon, maogma asin marhay an buhay, gurano man kagabat an mga agyat  na presente sa aroaldaw!