Estudiantes dapat dai bawal an magdarang mobile phone, sabi

Sarong opisyal kan Department of Education (DepEd) sa Ciudad nin Naga nagtutubod na dapat dai mahalian nin gamit sa kumunikasyon an estudiante alagad dai siya pabor sa pagbabawal envez e-regulate sana an paggamit nin mobile phones asin iba pang electronic gadgets.

Ini an mga pahayag sa media ni Assistant Division Superintendent Fernando Macaraig kasunod kan propuestong ordinansa sa Sangguniang Panlungsod na nagtutulod ibawal na sa mga estudiantes an paggamit nin mobile phone huli ta nakaka-disturbo sa pagklase.

Dai siya pabor sa totalmenteng pagbawal alagad e-regulate sana mantang an cell phone importanteng kumunikasyon kun may nangyayaring krimen maging sa emerhencia.

Si Consejal Joselito S.A. Del Rosario nagsabi na sa saiyang propuestong ordinansa bakong totalmenteng ibawal alagad e-regulate an paggamit mantang nakaka-disturbo envez na dapat naka-focus sa classroom discussions. Kun maaprubaran ini dakulang bagay nganing mas ma-improve an saindang pag-adal para man sana sa saindang futuro sa edukasyon.

Piglinaw kan consejal na maagi pa sa consultasyon o public hearing antes maaprubaran kan SP an propuestong ordinansa.

Haros gabos nang estudiantes iguang darang mobile phones asin kaipuhan na an estrictong regulasyon sa paggamit kaini alagad dai man totalmenteng ibabawal, sabi pa.

An ibang pribadong escuelahan sa Ciudad nin Naga haloy nang may estrictong regulasyon sa paggamit nin mobile phones kan estudiantes sa classroom.

Nagkapera nang magurang an nagpahayag man dai sinda pabor kun ibabawal nang entero kan ciudad envez sa oras sana nin klase.