Estudiantes sa secondarya iguang libreng internet access

Ni Sonny Malate

San Jose, Camarines Sur ---  May libreng serbisyo na sa internet access  an mga estudiantes sa anom na escuelahan sa secondarya sa banwaan na ini.

Huli sa  Ordinance No. 2025 - 017 na pigpadrinohan ni Municipal Councilor Juancho C. Ras sa Sangguniang Bayan sa pamamayo ni Bise Alkalde Daniel Pervera, an mga escuelahan sa secondarya sa banwaan na ini an magkakaigua nin libreng serbisyo kan internet gikan sa sarong privadong service provider.

Segun ki Ras, an mga secondary schools iyo an Adiangao High School, Rangas Ramos National High School asin San Jose National High School. Kairiba pa man an Salogon National High School, Villafuerte - Peña National High School asin an Vivencio Obias Kinalansan National High School.

Nanotaran ni Konsehal Ras na mahalagang maray an pagkakaiguang  internet connection para sa mga estudiantes. Durante kan siya saro pang punong barangay, giromdom niya na may mga estudiantes na naghahagad sa saiya nin pambakal nin load para sa research ninda.

Pigbanggit  niya na kun may libre nang internet access sa mga escuelahan, dakolang kageanan man sa mga tios na magurang  mantang  dae na mahagad nin kuwartang pangload an kaakian ninda.  

Segun ki Ras, an local government unit (LGU) nag-alocar nin taonan na Ciento Cuarenta Mil (Php 140,000.00) Pisos para sa libreng servicio kan internet.  An sistema sa pagbayad kan internet bill sa napiling service provider pig-aasikaso na kan LGU.

Susog sa sistemang nahaman, an internet Modem itataltag sa school pavilion o edificio na parating pigtitiriponan kan mga estudiantes. Bukas an servicio kaini, Sabado asin Domingo, kun kinakaipohan para makagamit kan mga estudiantes.

Mientrastanto, pigbuyagyag ni Ras na nasa first committee hearing na an saiyang proponedong ordinansa  na maextendir nin cash incentive sa mga frontline service workers sa 29 barangay sa San Jose. 

An mga personahes kan barangay iyo an Barangay Health Worker, Barangay Tanod,  Barangay Nutrition Scholar asin Day Care Worker. 

Nanotaran ni Ras na an mga personahes na ini an dakolaon an  pakinabang sa barangay alagad hababaon an allowance na pigduduhol kan barangay sa sainda.

Sa irarom kan proponedong ordinansa, sinda marecibe nin cash incentive base sa saindang numero nin taon sa servicio asin edad. An konsehal naglalaom na sa suporta kan pag-iriba niya sa LGU, ini an magkakatotoo sa madaling panahon.