Estudiantes tada na nin trauma sa bakbakan kan militar, NPA
Nagiging causa nin trauma sa mga estudiantes sagcod na napipiritan na mag-panic kun nagkakaigwa nin encuentro an mga kapupulisan, soldados kan Philippine Army laban sa rebeldeng New People’s Army.
Ini an dakulang epekto sa mga jovenes maging paratukdo na inaabot pa nin nerbiyos kun sunod-sunod an pabalyohan nin mga putok hali sa mag-ibong na lado na nangyari alas 9:30 nin aga, Marso 30, 2023 sa lugar kan Caorasan High School sa Barangyay Caorasan, Bula, Camarines Sur.
Si Deputy Chief of Police David Olleres kan Bula Municipal Police Station nagpahayag kaini sa miembros kan media kasunod kan nangyaring bakbakan kan tropa kan gobierno asin NPA. Dawa ‘‘successfull’’ si operasyon kan mga soldados kan gobierno asin Philippine National Police alagad maging sibilyan apektado man giraray, sabi pa kan MPS.
An pinagsarong elementos kan Police Regional Office 5; 501st Maneuver Company, RMFB5; Charlie Coy, 49IB, 97 MICO, 9MIB tolos naglansar nin operasyon kontra sa rebeldeng grupo matapos makarecibe nin inpormasyon hali sa residentes kan barangay na igwang armadong grupo sa saindang lugar sa Barangay Caorasan, Bula.
Sinabi pa kan MPS Bula Maabot sa quincing (15) miembros kan NPA nasagupa kan mga military asin PNP na inabot nin veinte (20) minutos si balyaohan nin putok na mayong ‘‘casualty’’ sa tropa kan gobierno maging sa rebelde alagad nabawi sa operasyon an mga kagamitan kan grupo kumunista.
An mga nabawi sa lugar kan encuentro hali sa grupo kan rebelde iyo an gamit sa pag-gibo nin IED; duwang cellphones; 12 fired cartridge cases para sa calibre 5.56; sarong jungle back pack; subersibong documentos asin mga personal na kagamitan.
Kinondena kan Bula MPS sa pamamayo ni Chief of Police P/Maj Rolando Kalagui Jr. an paghahasok nin kariribokan kan NPA sa Barangay Caorasan, Bula na nagdulot nin sobra sa pagkatakot kan mga residentes asin mga estudiantes.
An kaparejong encuentro harani sa mga public schools enot nang nangyari sa nagkaperang mga banwaan kan Masbate kan huring semana kan Marso 2023.
An mga apektadong escuelahan kan elementarya asin sa segundarya segun sa DepEd Masbate hali sa mga banwaan kan Dimasalang; Placer, Uson, asin Cataingan.
Sinuspende an face-to-face classes nin sarong semana alagad balik man sana pakatapos nin sarong semana.
An sinambit na insidente kinokondena kan DepEd huli ta dakulang epekto sa pag-adal kan mga kaakian inaabot pa nin pagkatakot an mga estudiantes maging paratukdo sagcod na igwang walat nin truma.