top of page

EVH sa Naga paborable sa ‘vulnerable sector’

Naging matuninong an premirong Early Voting Hour (EVH) sa mga senior citizens, PWDs asin bados sa Ciudad nin Naga sa nagtapos na Barangay, Sangguniang Kabataan Elections (BSKE) kan Oktubre 30, 2023 huli ta naging paborable sa sainda an oras asin posibleng mangyari liwat sa mga masunod na eleksyon.


Si Abogado Maico Julia Jr. Election Officer kan ciudad nagpahayag na kun igwa man sadit na problema naresolberan man tolos sagcod nakaboto. Paborable sa sinambit na mga sektor huli ta presco si oras asin bako pang surusoan si linya kan mga nagboboto.


An saro sa nakaabot na reclamo sa opisina ni Julia iyo an huring pag-abot kan ibang watchers sa nagkaperang voting precint sa Pacol Elementary School maging sa ibang mga barangay alagad an orden kan election officer idagos na an pirilian huli ta dapat exaktong alas 5:00 nin aga yaon na sinda sa presento.


Duwang oras sana si tinaong plaso sa EVH poon alas 5:00 hasta alas 7:00 nin aga.


Sinabi ni Julia an Naga saro sana sa duwang ciudades sa nasyon kabali an Muntinlupa na tinugotan kan Commission on Election bilang pilot area.


An Office of Senior Citizens Affairs sa ciudad nagpahayag man na dakulang bagay sa saindang pag iriba nganing dai na makisuksokan sa dakul na botantes mantang an amay na pagboto presco an panahon saka dai pa siriksikan sa mga voting precent.


Labi sa 22 mil an rehistradong botantes hali sa saindang sektor.


Alagad sinabi pa kan Comelec kun naging positibo si resulta an EVH sa duwang ciudad posibleng i-adaptar sa mga masunod na mga pirilian lokal asin nasyonal bako lang sa barangay asin sangguniang kabataan.


Sa Naga City Police Office, sinabi ni spokesperson PSMS Tobias Bongon III na heneralmente naging matuninong si resulta kan BSK Eleksyon sa 27 barangay kan ciudad.


Nagdestino an NCPO nin mga kapupulisan sa cada voting center tanganing maseguro an paz y orden.

Si Col. Nelson Pacalso, City Director kan Naga City Police Office nagpapahayag sa entrevista kan media na naging matuninong an pinaka-premirong Early Voting Hours sa Ciudad nin Naga saka si maghapon na pirilian sa BSKE. (NCPO)

Comentarios


bottom of page