Excise tax sa petrolyo suspendiron, libreng sakay bakong solusyon-Condor

Pinapairiwal sana kan gobierno an sektor nin transporte kan saindang Service Contracting Program (SCP), ‘‘Libreng Sakay’’ kan Land Transportation Franchising and Regulatory Board (LTFRB) huli ta pili sana an tinatawan nin permit apesar anas man sinda apektado kan pandemya.


An dapat ginibo kan gobierno nganing gabos makinabang tunawon an oil deregulation law asin suspendiron an excise tax na iyo an nagpapagabat sa mga motorista asin sektor nin transporte huli kan pagparalangkaw sa presyo kan petrolyo, sabi kan Condor-Piston Camarines Sur.


An gobierno nagtagama nin Php7 bilyon sa SCP Libreng Sakay igwa napapaboran na public utility jeepney asin van na miembros kan cooperativa na rehistrado sa Cooperative Development Cooperative alagad mas dakul si dai pa rehistrado sa CDA na iyo an nagrereclamo.


Dejado na an PUJ asin Van na dai rehistrado sa CDA asin digdi na nag-aaragawan nin pasajeros saka nag-iiriwal an tsuper mantang si mayong permit sa Libreng Sakay kulang nang pasajero apektado an saindang hanapbuhay.


Dawa igwang nakikinabang kan Libreng Sakay alagad an importante dapat magbaba an presyo kan petrolyo.


Sinabi ni Joel Pillogo, lider kan Condor-Piston na kun naggagastos an gobierno nin Php7-B sa SCP kan LTBRB envez an dapat ginibong solusyon sinuspende na muna an excise tax nganing magbaba an presyo kan petrolyo. Huli kaini, gabos makikinabang huli ta dai magpaparalangkaw an presyo kan gasolina asin diesel.


Afuera pa kaini, yaon pa an fuel subsidy sa transporte na bilyones pesos an fondo digdi kan DOTr na pinapaagi sa LTFRB.


Kun sinuspende an buwis sa petrolyo envez kan bilyones pesos na mga subsidiya an gabos namamanuan Filipino an makikinabang, sabi pa ni Pillogo.


Sa ngunian an petisyon sa dugang na flete iginilid sana kan LTFRB karibay kan fuel subsidy na temporyayo sanang solusyon. (dpa)