EXCISE TAX SUSPENDIRON: Transport sector disganado sa katiting na rollback sa petrolyo

Marhay na sa mayo alagad disganado an sektor nin transporte sa Camarines Sur sa rollback sa presyo nin petrolyo kan Martes, Marso 22 dai pa ngani nacincuenta por ciento sa pinatong na semanal na presyo puon kan Enero, Febrero asin Marso 15.

Matamlay pa an pagkayod aroaldaw mientras na an ibang pampasajerong jeepney asin tricycle iginilid na ngona an pag-viaje ginagamit nalang sa mga pan-personal asin may minsan igwang nag-aarkila, dai pa nalulugi.

Ini an mga pahayag ni Joel Pillogo, lider kan Condor-Piston sa Camarines Sur mantang nasa alert level 1 na an Ciudad nin Naga asin alert level 2 sa CamSur dakul na an nagruruluwas na pasajeros alagad apektado an saindang hanap buhay sa pagkayod igwa naman inaatubang na pandemya sa pagparalangkaw kan presyo.

Hagad ninda sa administrasyon ni Presidente Duterte na an puedeng solusyon suspendiron ngona an excise tax asin tunawon an oil deregulation law.

Sinabi pa kan Condor-Piston an problema nagpapatubod an mga higanteng compania nin lana na an causa kan nangyaring semanal na paglangkaw kan produkto nin petrolyo huli kan nangyayaring giyera sa Ukraine asin Russia.

Pa’no mangyari na an pig-aangkat ta sa European countries arena bakong petrolyo, pigluluko sana an gobierno asin Filipino, sabi pa.

Huli kaini, dapat iimplementar an ‘‘mega rollback’’ asin ibalik si hababang presyo kan petrolyo sa enot na semana kan Enero 2022.

Saiyang pigbuyagyag na puon kan Enero hasta Febrero naglangkaw nin Php30 an diesel nagsunod pa an semanal na paglangkaw kan presyo ngunian na bulan nin Marso 2022 na nag-aabot sa Php19.50 sa diesel; Php11.60 sa gasolina; asin Php15.35 sa kerosene.

Nagtutubod an sektor nin transporte na si ginibo nindang nationwide protest rally kan Marso 15 laban sa pagparalangkaw kan presyo sa petrolyo natanyog an mga higanteng companiya nin lana nganing mag-roll back sa presyo sa tahaw kan reclamo na kan namamanuan Filipino sa paglumpat kan sinambit na produkto asin apektado na an mga prime commodities.

Kun marealisar na tunawon na an oil deregulation law an gobierno iyo na an mabakal kan petrolyo sa ibang nasyon nganing idistribuer man sa mga companiya nin lana na ipapabakal sa tama asin hababang presyo.

An resulta an makakagian sa mga motorista asin sektor nin transporte asin namamanuan Filipino, segun pa sa Condor-Piston.

An ibang grupo nin transporte dai uyon sa pagpalangkaw singil sa tarifa sa pasajeros asin an gibohon digdi solusyon para sa gabos.

Marhay ngani igwang mga pasajeros na kun P9.00 an flete an on peso uli sa diez pesos dai na ninda kinukua sa tsuper, nakaka-intiendi kan samuyang kamugtakan sa nalulugi maghapon na kayod. (dpa)