Expanded F2F classes mapuon na sa Marso 1

An Departamento de Edukasyon (DepEd) sa Bicol nag-aandam na kan expanded face-to-face classes mantang igwa nang dating 20 pilot public schools sa Bicol an enot nang nagkunducir klase kan Deciembre 2021 alagad kan magparalangkaw si caso sa Covid-19 kan Enero 2022, sinuspende an gabos na mga in-person classes.

Si Gilbert Sadsad, regional director kan DepEd nagpahayag na sa Marso 1, 2022 pig-aandaman kan dugang na 1,500 escuelas publica sa Bicol an expanded face-to-face classes matapos ibaba na kan national IATF sa alert level 2 an Kabikolan.

Si enot na F2F classes duman sana sa mga piling barangay na mayong caso kan coronavirus disease siring kan Albay, Masbate, Sorsogon, asin Camarines Sur.

Ginigibo na kan mga escuelahan an saindang rekomendasyon alagad kaipuhan magsunod muna sa halabang rekisitos kan opisina sentral kan DepEd particularmente an gabos na preparasyon sa health protocols kan Department of Health.

Kabale sa makakalaog sa in-person classes iyo an kindergarten, grade 1 to 3 sa segundarya grade 7 to 10 asin grade 11 to 12.

Tinao na kan DepEd national sa mga direktor rehiyonal an pag-aprubar kan expanded F2F classes nganing madali an pagpaluwas nin desisyon alagad dapat ma-inspeksyon muna kun nagsunod sa national guidelines antes tugotan an arin man na escuehan sa in person classes.

Bako gabos na estudiantes an tutugotan sa F2F classes nin huli ta limitado sana sa 25 estudiantes cada classroom asin igwang permiso hale sa guardian o magurang kan aki o estudiante.

An lambang lokal na gobierno kinakaipuhan pa an saindang aprubal kun uyon na magbalik an mga estudiantes sa classroom.

Dakul nang mga magurang an nagpapabor sa pagbalik kan in-person classes mantang apektado an calidad sa pag-adal an mga estudiantes sa modular learning asin online classes na sinasabayan pa kan palpak na serbisyo kan internet.

Mientras tanto, pig-aadalan na kan DepEd national office kun ibabalik na an normal na in-person classes sa gabos na escuelahan sa bulan nin Agosto o Septiembre 2022 alagad kaipuhan na mag agi giraray sa aprubal ni Presidente Rodrigo Duterte. (dpa)