F2F classes sa DepEd Naga maeenot sa itaas na brgy

Nagtutubod an City School Division kan Department of Education (DepEd) sa Ciudad nin Naga na aaprubaran kan opisina sentral an rekomendasyon kan DepEd Bicol na tugotan na an sarong elementary school digdi para sa pilot limited face-to-face classes (F2F) na posibleng punan sa masunod na bulan nin Deciembre 2021.

An Panicuason Elementary School sa itaas na barangay kan ciudad iyo an pigsumiter ni City School Division Superintendent Manny De Guzman sa opisina rehiyonal kan ahencia nganing makabale na sa listahan na tutugotan na sa F2F classes sa masunod na bulan.

Si DepEd regional director Gilbert Sadsad nagpahayag na kabale na an sarong elementary school sa Naga sa mga dugang na escuelahan sa Camarines Sur na saiyang pigrekomendar sa opisina sentral nganing magkaigwa na kan in-person classes.

Apat na mga escuelahan hale sa Del Gallego asin duwa sa Sipocot, parejo sa Camarines Sur, sabi pa.

Sinabi ni De Guzman na si enot na pigrecomendar na Teodora Moscoso Elementary School sa barangay Carolina dai pa nagtugot si Alcalde Nelson Legacion mantang igwa pa digdi nin active case sa Covid-19.

Sa F2F classes, sinabi pa kan opisyal kan DepEd Naga na puon sa kindergarten, Grade I, II asin III an pigrecomendar alagad limitado sa doseng estudiantes cada classroom para sa laog nin tolong aldaw asin an natatadang duwang aldaw cada semana buelta sa modular instructions.

An barangay Panicuason zero sa Covid-19 case asin nakumple an gabos na guidelines kan saindang opisina sentral para sa sarong escuelahan na magkakaigwa nin F2F classes.

Padagos na an ginigibong preparasyon kan mga paratukdo kabale iyo an pagbugtak nin plastic barrier asin dapat iba an ‘‘entrance asin exit’’ sa lambang classroom.

Imbitado ni De Guzman an ibang mga escuelas publica nganing maheling an pag-andam sagcod sa pagsunod sa safety and health protocols.

An premirong escuelahan na masikad na kan in-person classes suportado kan City Hall, paratukdo asin magurang.

Dai maiibitaran na pabalik na sa normal na klase sa mga classroom kaya dapat punan na sa ciudad. (dpa)