Fake news kinukundenar kan CEGP

Sa inaatubang ngunian na mga misinformation asin fake news mantang nagrarani na an eleksyon nasyonal asin lokal, an College Editors Guild of the Philippines (CEGP) sa Bicol nanga-ngapudan sa mga politico na dai gamiton an Social Media sa saindang pagsasadiring interes ngani sanang ma-‘‘weaponized’’ an tawo sa mga inpormasyon para rauton an saindang kalaban sa maabot na eleksyon.


Ginagamit ini para imanepular an opinyon publico envez na tubodon sinda kan publico tibaad sinda man sana an bueltadahan alagad igwa man napapatubod kan salto asin putik na inpormasyon.


Ini an mga pahayag ni Abagail Kayla Bilan, regional coordinator kan CEGP Bicol mantang pigrurumdum kan campus writers an ika-doseng aniversaryo kan Maguindanao massacre kan Noviembre 23.


Namamaniobra an opinyon kan publico sa katutuanan, dapat labanan an arog kaining sistema kan tradisyonal na politico.


Komo joven na parasurat, sinabi pa ni Bilan pinapadagos kan CEGP an saindang advocacia nganing dai mawara an tunay na katutuanan asin mga isyu huli ta trabajo kan media workers an pagpaluwas kan bareta na may katutuanan.


Bako lang sa mga bareta alagad an katutuanan mismo an isasawalat na inpormasyon sa publico bakong pagmamanipula kan ibang mga politico.


An saindang advocacia laban sa fake news nagkakaigwa nin mga webinar, mag-educar sa publico asin campus writer, estudiantes, na dai basta magtubod sa disinformation.


Saindang pinapaliwanag kun panong mabubusising marhay an inpormasyon lalo na kun makaduda.


An nangyayari pa sa ngunian nahahalon kan publico kun dai nag-aaram kan totoong inpormasyon sa social media, alagad sa saindang advocacia ipaintindi sa tawo an mga nagluluwas sa FB maging sa online dapat maging ‘‘matalino’’ an mga tawo kan credible information, sabi pa kan lider kan CEGP Bicol.


Nag-aapelar man sinda sa troller nin mga politico na tama na dai paglukohon an publico.


An social media ginagamit ngunian kan mga politico sa saindang amay na kampanya mantang igwa pang pandemya limitado an saindang paglibot-libot sa mga barangay huli sa pig-iimplementar na mga restrictions kan national IATF. (dpa)