Familia kan binadil gadan na dating PB, naghahagad justicia

San Jose, Camarines Sur --- Justicia an kurahaw kan familia ni dating Punong Barangay Jonathan Clidoro kan Catalotoan sa banwaan na binadil gadan kan dai pa mabidbidan na suspechado kan Marso 30.


Si Maria Clidoro, aki kan biktima nagpahayag sa atubang kan miembros kan media na dai sinda matugot na dai matawan justicia an saiyang ama alagad hagad niya sa suspechado na magluwas asin itukdo kun siisay an responsable sa krimen.


‘‘Maconciencia ka, magsuko kana’’. Kontrobersyal na an insidente sagcod nagluluwas an akusasyon na may motivo politica mantang an biktima lider sa barangay kan sarong nagcacandidato sa Partido district.


An dating Punong barangay mayong kalaban-laban asin daing herak na pinaputokan nin badil mantang nakatambay harani sa saindang residencia sa Brgy. Catalotoan.


Sa inisyal na inbestigasyon kan Municipal Police Station kan San Jose, Camarines Sur lunad sa sarong motorsiklo an gun man base sa nakaheling kan insidente.


Dai paman maaraman kan MPS an motivo kan krimen mantang nagpapadagos pa an inbestigasyon asin hagad ninda sa testigos na magcooperar sa awtoridad nganing masangatan caso an suspechado.


Si Gobernador Migz Villafuerte kan Camarines Sur nagtaya na nin on milyon pesos na itataong reward money sa makakatukdo asin makakadakop sa suspechado.


Kinundenar kan mga punong barangay kan San Jose an sinambit na krimen saka hagad ninda sa MPS na kaskasan na an inbestigasyon nganing maaraman an responsable sa tahaw kan nagiging isyu na an posibleng may motivo political.