Farmers’ Ass’n, Entreps actibo sa mga Trade Fair

Ni Sonny Malate

Padagos sa pagigin actibo an mga miembros kan grupo nin mga parauma asin mga entrepreneur sa pagbale sa mga trade fair na pigpapadrinohan kan mga ahencia kan gobyerno sa probinsya kan Camarines Sur.

Sa Kadiwa ng Pangulo and Agri-Fair na ginibo kan Junio 19 hasta 22 sa Goa, Camarines Sur, 14 gabos na farmers’ association asin entrepreneurs an nagparticipar. Man-iba-ibang klaseng presko asin pigprocesong produkto an pig display asin pigpabakal digdi.

Pigmanehar an actividad kan Municipal Agriculture Office kan Goa sa pamamayo ni Engr Carlo I. Palaypayon, Municipal Agriculturist. Katabang iyo an LGU Goa, DTI, DOLE asin ibang stakeholders.

Presente iyo sinda Alkalde Alfredo P. Gonzaga III, Elsa A. Parot, Center Director, Agricultural Training Institute (ATI) asin mga personahes kan Department of Agriculture Regional Office 5, Municipal Agriculture Office, mga oficiales local asin mga multi-sectoral representatives.

Saro sa mga miembros kan Goa Agri Producers and Processors Association asin kabale sa trade fair, si Salvacion S. Garchitorena, an nakaobservar na an mga pag-iriba niya asin sa ibang grupo an sustenido sa pagbale sa mga trade fair. Ini nin huli ta nabibisto asin nababakal an saindang mga produkto.

Segun ki Garchitorena, sa Agri Summit na gigibohon sa Junio 25-28 sa sarong mall sa ciudad nin Naga, sinda maparticipar liwat. Dakula an pasasalamat niya sa suporta kan oficina regional kan DA orug na kan ATI kaya mabale sinda digdi.

Enot pa kaini an mga pag-iriba ni Garchitorena an nagparticipar man sa sarong trade fair na tampok an mga inomon asin kakanon. An arog kaining mga trade fair parating pigpapadrinohan kan DA asin Department of Trade and Industry (DTI).

Huli sa mga trade fair na ini nakakaguno nin halangkaw na benta an mga participantes gikan sa walk-in asin online buyers. Sa kadakol na beses may mga order hale pa sa luwas kan nacion.

Si Garchitorena na sarong retiradang paratukdo an kagsadiri kan Manuel’s Garden na namumugtak sa tres hectarias na daga sa irayang barangay kan Goa. Sa laog kan mahiwas na lote yaon an mga herbal plants na nagseserbing pang-intercropping sa kadaklan mga niyog, asin iba pa.

Sinabi ni Garchitorena na ginigibo sa uma niya an organic farming na nagreresulta sa pagkakaiguang produktong marhay sa salud kan tawo. An sistemang ini an higot na pig-iimplementar kan gobyerno sa bilog na nacion.

Sa ngonian, an uma ni Garchitorena iyo an pigkukuahan niya kan mga pananom sa pagproceso kan tsa (tea) na gikan sa lagundi, malunggay, lakad bulan, pandan, tanglad asin ibang pananom na abundang nagtutubo sa kapatagan kan Partido Area.

Segun sa retiradang paratukdo, an Municipal Agricultural Office pati na an DA higot an suporta sa sainda sa lado nin skills training, financial assistance asin sales/marketing para sa saindang pagproducir asin proceso kan mga produkto.

Mientrastanto, pigbuyagyag ni Garchitorena na an grupo ninda an mabale sa Bishop Francisco Gainza Trade Fair sa bulan na Septiembre. Naglalaom an miembros na dakula an magigin benta ninda huli sa pagroso kan katawohan sa kafiestahan ni Nstra. Sra de Peñafrancia.

Mga pigprocesong producto tampok sa trade fair para sa farmers' group asin entrepreseneurs. (Photo - Manuel's Garden)